No.5889/2020-2021

Vawiin chhun khan Health & Family Welfare Minister Dr. R. Lalthangliana'n a pisa ah COVID-19 hripui lengin khawtlang a nghawng dan zirchianna bu "Awareness of COVID-19 Pandemic and Community Response to the Challenges Posed : An Analytical Study of Aizawl South City Area and Khawzawl Town" a tlangzarh, he lehkhabu hi Institute of Advanced Studies in Education (IASE), Aizawl leh Government Khawzawl College tangkawpin an buatsaih a ni a, COVID-19 hripui vanga Mizoram Lockdown a nih tan tirh laia Aizawl chhim lam veng 5 leh Khawzawl an zirchianna a ni.

Legkhabu tlangzarhtu Health Minister chuan IASE leh Government Khawzawl College tangkawpin COVID-19 hripui chungchang zirchianna an buatsaih chu lawmawm a tih thu sawiin, COVID-19 hripui vanga kan buai tantirh lai daih tawh a hetiang ngaihtuahna an lo seng chu an fakawma tih thu a sawi a. COVID-19 mizoramin kan do dan chu ram pawn atang pawgin an ngaihven a ni tih sawiin, kan thlen china hma kan lak dan zirchian tlak niin a lang a, zirchian chhunzawm zel pawh a tul hle a ni, a ti a. Mipuite zirtir nan a tangkai dawn bakah hun lo la kal lehzel turah zirbing mite pawhin an la chhawr tangkai zel dawn a, a hlut zia kan la hriat belh zual zel dawn a ni, a ti.

Health Minister chuan tunhnaia zirchianna pakhatah India rama sawrkar leh private enkawl COVID-19 sample test na laboratory 1800 awmin, tunhnai thlakhat chhung vel atang khan nitina sample test zat pawh a pung chak hle a, chawh rualin nitin sample nuai 11 vel test thin a ni a, India rama sample test tawh zawng zawng atanga COVID-19 positive hmuhchhuah zat (national average) chu 8.52% a ni a. India ram State leh UT 14 hian national average aia hniam positive hmuhchhuah zat percentage an nei a, chung zingah chuan Mizoram hi a ti tha ber niin sample kan test tawh atanga 2.45% COVID-19 positive an ni a, Manipur chu pahnihna niin 4.3% COVID-19 positive hmuhchhuah an ni, a ti a. heng zawng zawng hi kan zavaia kan thawhhona rah leh Pathian venhimna vang liau liau a ni a, Zoram mipui zawng zawngte chungah lawmthu ka sawi a ni, a ti.

IASE leh Government Khawzawl College tangkawp hian kumin march thlaa Mizoram inkharkhip (Total Lockdown) a nih khan lockdown in mipui leh khawtlanga nghawng a neih dan an zirchiang nghal a, lockdown a nih avang leh COVID-19 vanga veivah a remchan loh avangin online leh mibile phone hmang ten an theih ang angin research an nei a, Aizawl chhim lam veng 5 - Upper Republic, Republic Veng, College Veng, Bethlehem Veng leh Salem Veng bakah Khawzawl khawchhung ah zirbingna hi kalpuiin June thla tawp khan an zo fel a ni. He lehkhabu hi phek 80 a chhah niin, copy 500 chhut phawt a ni a, khawtual mipui, Local/Village Level Task Force, sawrkar hnathawk, medical lam mi, sumdawng/dawrkai, zirlaite, kohhran hotute leh nitin eichawp zawnga inhlawh thinte hnen atang zirchianna hi kalpui a ni.

Institute of Advanced Studies in Education (IASE), Aizawl hi Mizoram sawrkar hnuaia zirna in zinga Post-Graduate Course, M.Phil leh Ph.D course kalpui awmchhun an ni a, kum kalta chhung khan India rama IASE tha berah thlan an ni bawk a ni.