Mizorama cham mek FIFA leh AIFF hotuten vawiin tlai khan Chief Minister Pu Lal Thanhawla chu a chenna bungalow-ah hmuin inkawmna hun tha tak an nei.

Football hotute hian Mizoramin footballah nasa taka hma a sawn avanga chak leh zuala hma a sawn theih dan tur rawn zira, puih theihna kawng awm thei awmte rawn enfiah a, rawn zirchiang tura lokal an nih thu Chief Minister hi an hrilh a. Chief Minister chuan FIFA leh AIFF in Mizoram chu abik taka an rawn ngaihven avang leh puih an duhnaah lawmthu a hrilh a. India ah sports discipline thenkhatah chi leh chi inthliarna a awm thin chu thalo a tih thu sawiin, hetiang inenhranna hi khawiahmah awmlo se a duh thu a sawi a. Thalaite hmakhua chu sorkarin a ngaihpawimawh ber te zing ami a nih thu football hotute chu hrilhin, a theihna apiangah sorkar chuan theihtawp a chhuah zel ang a ti.

FIFA hotute chuan football chawikanna kawnga Mizoram sorkar hmalakna chu fakawm an tih thu an sawi a. Hmasawnna zel tura rawtna an neihte Chief Minister hi an sawipui bawk a ni.

FIFA hi khawvela footballa thuneitu sang ber a ni a, AIFF hi India a footballa thuneitu sang ber a ni bawk a. Vawiina Chief Minister hmutute hi Dr.Shaji Prabhakaran, Regional Development Officer for FIFA in South and Central Asia, Pu Vincent Subramaniam, FIFA Technical Development Officer, Pu Sunado Dhar, I-League Chief Executive Officer leh Pu Savio Medier, AIFF Coaching & Academy Director te an ni a. An ni hi MFA President Pu Lal Thanzara, Minister of State leh Pu Lalnghinglova Hmar (Tetea Hmar), MFA Secretary ten an rawn ho a ni.