Champhai District chhunga bialtu MLA theuh ten an constituency tin a Model Village an thlan enkawl leh thuamthat dan tur chungchangah Saansad Adarsh Gram Yojana (SAGY) zirhona vawiin khan Champhai DC Pu H. Lalengmawia hovin DC Conference Hall, Keifangtlang-ah Charge Officer-te leh Department hrang hrang hotuten an nei a. Pu V. Lalengmawia, Deputy Secretary, RD chuan zirtirna hi a pe a ni.

DC Pu H. Lalengmawia chuan Model Village atana khaw thlan te chu ngaihtuahna dik leh hmathlir changkang neih theih na atan mihring thinlung buatsaihna hmalakna a nih thu sawiin, ‘infrastructure’ tha pui pui siam tura pawisa pek lam a nilo tih chu mipuite pawhin an hriat a pawimawh a tih thu a sawi a. SAGY hnuaiah a hranpa fund a awm dawnloh avangin a mawhphurtu department theuh te chuan thawhhona tha an neih a pawimawh thu a sawi a. Scheme hrang hrang thlunzawm (convergence)-a hna kalpui mekah hian a hmawrbawk ah chauh thawk ho lova, a tir a mipui thinlung buatsaih a, ‘awareness’ pek atang hian thawhhona tha neih a ngai takzet a ni, DC chuan a ti.

Pu V. Lalengmawia chuan SAGY ah hian a hranpa a sum ruahman a nih loh thu leh Centrally Sponsored Scheme (CSS) hrang hrang kalpui danah heng model village-te hi ngaihpawimawh a nih tur thu te leh, CSS atanga pawisa awm sa atang hian hma lak a nih tur thu a sawi a. SAGY hnuaia MLA ten hmalakna an kalpui dan tur leh Charge Officer-te mawhphurna hrang hrang a sawifiah bawk. Thianghlimna kawnga hmasawnna chu hlawhtling leh hlawhtlinglo tehna pawimawh tak a nih thu tarlangin, inthiarna chungchangah ringawt pawh Mizote zingah pawnlai a inthiar thin sawi tur awm tawh meuhlo mah ila ‘pit latrine’ kan tih te hi ‘open defecation’ (pawna inthiar) anga ngaih vek a nih thu a tarlang a. Model Village chu khua entawntlak a nih theih nan a khawchhung mipui zingah mirethei pawh an tlem tial tial tur a ni, tiin, BPL nih chu thil duhawmlo tak a nih thu leh chumi retheihna atang chuan talchhuah tuma bei tang tang turin mipui kan inzirtir a pawimawh a ni, a ti.

Champhai District chhunga Constituency panga chhunga Model Village pakhat theuh bakah Aizawl South-I bialtu MLA in Model Village atana a thlan Biate chu Champhai Administrative District hnuaia awm a nih avangin a vaiin paruk (6) a awm ta a. Biate bakah hian Tuichang A/C bialtu MLA Pu Lalrinliana Sailo thlan Chawngtlai-ah te BDO Khawzawl Pu Lalrinzuala chu Charge Officer-a ruat a ni a. Champhai-N bialtu MLA Pu TT Zothansanga thlan Rabung khuaah DCSO Champhai Pu Lalkunga Sailo  chu Charge Officer niin, Champhai-S bialtu MLA Pu JH Rothuama thlan Ruantlang-ah Champhai BDO Pu R. Zoremthara chu Charge Offficer a ni a. Tuipui East bialtu MLA Pu T. Sangkunga thlan Khuangthing chu Khawbung BDO Pu James Lalnithanga’n enkawl in, Lengteng bialtu MLA PU H. Rohluna’n Model Village atan a thlan Kawlbem-a Charge Officer chu Ngopa BDO Pu Malsawmzuala a ni.