Vawiin khan Lunglei West bialtu leh Chairman, ZENICS ni bawk Pu Chalrosanga Ralte chuan Lunglei khawpuia a bial chhunga Sorkar hmalakna hrang hrang te a hmunah a tlawh.

Mizoram Sport Council hnuaia sak mek Sazaikawn-a Multi-Purpose Sports Complex sak mek tlawhin Pu Chalrosanga Ralte chuan hnathawh dan chu tha thawkhata a hriat thu a sawi a, he hna enkawltu Contractor Lushai Engineers hotute chuan tun dinhmunah a pumpuiah hna zaa 60% thawh a nih tawh thu leh nakum kum tawp lamah hna zawhfel theih an in beisei thu MLA hi an lo hrilh a ni. Indoor Stadium panna kawngsiamdan tura hmalakna leh tui chungchanga harsatna an tawh te bialtu MLA hi an lo hrilh bawk. Multipurpose Sports Complex sak mek hi a senso tura chhut chu vaibelchhe 6 a ni a, a chhungah infiamna chi hrang hrang a awm ang.

Pu Chalrosanga hian Mizoram Sports Council hnuaia cheng nuai 80 hmanga Rahsiveng YMA Hall cheithat hnathawh mek leh National Urban Health Mission atanga cheng nuai 67 hmanga sak mek ‘Sazaikawn Urban Health Centre’ te pawh tlawhin hmalak dan leh hnathawh dan te tha thawkhat a a hriat thu a sawi a. Khawtlang hruaitute chuan an bialtu MLA hmalakna hrang hrang avanga hmasawnna an hmuhah te lawmthu an lo hrih a ni.