Music leh Art thlurbingna Documentary Film Festival on Music and Art nihnih awh chu kar hmasa khan tluang takin I & PR Auditorium –ah neih a ni a. Festival chhimtu Mizo film siamtute leh College zirlai tamtak ten hlawkpui an inti hle.
Festival neih chhung hian I & PR Auditorium-ah nitin Documentary film lar leh Award hial lo dawng tawhte chhuah thin a ni a, festival in a tum ber chu Mizo ten film tha leh thianghlim ngainat nachang kan hriat a, mahni hnam mil leh nihphung behchhan film tha siam nachang kan hriat theih nante tih a ni a. Film siamtute pawhin hetiang lam hawi film siam a thatzia leh chu chuan hnam anga mite alo chawilar tawh thin dan te, khawvel pumpui deng chhuak hial khawpa film tha-in ram a lak theihzia te Film hmanga tarlan a ni bawk a ni. Mizoram Films Development Society member te, film producers te pawhin he festival hi hlawk thlak an ti a, film screening zawha zawhna leh chhanna hun pawh tangkai taka hmangin ngaihdan leh zawhnate zawha sawiho thin a ni.
Film Festival hi North East Film and Cultural Society leh Information & Public Relations Deptartment tangrualin an buatsaih a ni a. I & PR Department chu tunah hian Films Development ah Nodal Department niin Film tih changtlun nan hma tamtak an la tawh a. Tun tum ami hi an hmalakna kallai pakhat a niin Mizo Film siamtute tan Film siam intihsiak- Film making Competition a buatsaih mek bawk a ni.
‘Documentary Film Festival on Music & Art’ hawn a nih khan Khuallian Pu Jim K. Chozah, Director, I&PR chuan Television channel tam tak ah film entlakloh hmuhnawm si Mizo mipuiten kan en nasa a. Heng film entawn tlak loh hian Mizo thalaite kawng diklo a kawhhmuh ang tih a hlauhawm hle a ni a ti a. Film thianghlim, hmuhnawm, hrisel leh entute tana bengvarna ang chi chhungkua a en ho dial dial theih , mimal leh khawtlang nun ti hmasawn thei tur ni bawk ngaihven a ngaihhlut a hun tawh a ni , tiin a sawi a ni.
Kum liamta leh kum in chhung pawh in Film siamtu te tan film festival,workshop leh exposure tour I&PR Deptt. chuan a lo buatsaih tawh thin a. Film siam tih hmasawn nan Mizoram Sawrkar in Rs 10 lakh kumtin recurring budget ah a dah chu tangkai leh zai thei ang bera hmangin, Mizoram sawrkar hmalakna te chu tha an tih em avangin Films Division, Ministry of Information & Broadcasting hnuaia awm chuan Aizawl khawpui hi Mumbai International Film Festival huaihawtna tur hmun kumhlun ah alo thlang tawh nghe nghe a ni.
