Vawiin chawhma dar 11:00 khan Serchhip DC Office Chamber ah Serchhip District Disaster Management Authority (DDMA) chu an Chairman Pi Juhi Mukherjee, IAS, Serchhip Bawrhsap ni bawk hovin an thukhawm a, Serchhip  District chhunga chhiatrupna lo thleng thei hmachhawn dan tur a ruahmanna (District Disaster Management Plan) an sawi ho a ni.

Vawiin District Disater Management Authority thutkhawmah hian Directorate of Disaster Management & Rehabilitation department atanga rikrum thila hman tur chhanchhuahna hmanrua (Search & Rescue Equipments) an dawn thar thu report a ni a, hmanraw dahna hmun (storage room) a chep thu leh rikrum thilah hmanrua lak chhuah zung zung a harsat thin thu sawi chhuah niin storage room thar neih dan ngaihtuah tum a ni. Serchhip District tan Disaster Emergency Operation Centre mumal taka din a nilo chu a vei thu sawi chhuakin Bawrhsap chuan Sawrkar Laipui duhdan (Central Government norms) ang taka Disaster Emergency Operation Centre, building hran hlak sak anih theih nan hma lak mek anih thu a sawilang bawk.

District Disaster Management Plan pawh chipchiar taka sawiho niin siamthat ngai lai te a rang lama siamthat a, belh leh paih ngaite chinfel vat ni se an ti a, Sawrkar Department zawng zawngte pawh District Disaster Management Plan a an mawhphurhna leh chanvo tarlan te uluk taka lo zirchianga rawtna leh selna te a awm anih chuan a rang lama DDMA hnena hriattir tura ngen ni se an ti bawk. District Disaster Management Plan hi thla ruk hnu ah thlirho leh a ni ang.

Vawiin DDMA thutkhawmah hian Serchhip District chhunga ram tih kan chungchangah FIR pathum thehluh anih tawh thu leh ram tikangtu te pawh manchhuah an nih tawh thu sawilan a ni.