Kar khat chhung awh Mumbai International Film Festival Aizawla neih chu vawiin khan a hmawr bawk a ni ta. Vawiin a kharna hun hi I&PR Conference Hall-ah neiin, Film-Making Workshop a tel te hnenah certificate hlanna neih a ni bawk.
Tarlan tawh angin Film Festival cum Workshop hi Sorkar laipuia Ministry of Information & Broadcasting hnuai a Films Division leh Mizoram Sorkar Information & Public Relations Department tangkawpin a buatsaih a ni a. September ni 15 a tan anih atang khan I&PR Auditorium-ah nitinin Mizo leh India mi bakah ramdang film siamtute kutchhuak film chhuah thin a ni a. Workshop-ah nitinin film siamtu thlan bikte tan Mumbai, Delhi leh Kolkata atanga mithiam lo kal ten film siam dan kimchang zirtirna an pe bawk a. Vawiin kharna hunah hian Film Workshop- a tel te hian film pahnih an siam chu an thlir ho a ni.
Festival tan tirh a lo kal Director General, Films Division, Govt. of India Pu V.S. Kundu chuan Aizawl chu kumtina Film Festival neihna hmun nghet atan a puang a. Mithiam sawmte chuan Mizoramah film siam lama talent tha tak tak nei an awm thu leh, chu an talent chu phawrchhuak thiam turin workshop chu an tangkaipui an beisei thu an sawi a ni.
I&PR Department chuan Mizoramah film siam lama hmasawn turin hma an la reng a. Tun tuma workshop-cum-festival neih chu Mizo film siamtute tana intuaihriamna kawng pawimawh tak a nih bakah, hmasawnna tur kawng tam tak la awmte tilang bawkin, Film Festival hi a hlawhtling hle a hriat a ni.
