Ni 10 chhung awh tur Ministry of Information & Broadcasting hnuaia Films Division leh Mizoram University, Department of Mass Communication tangkawp buatsaih Best of MIFF @Mizoram, Documentary Film Festival & Filmmaking Workshop chu nimin khan MZU, Department of Mass Communication ah neih tan a ni.

Workshop hawnna-a thu sawitu MZU Vice Chancellor Prof. K.R.S. Sambasiva Rao chuan film hi tunlai khawvelah thil tangkai tak, kawng dik leh zirtirna dika min kaihhruia theitu hmanrua tha tak a nih thu sawiin, workshop-a tel te chu Mizo nunphung, hnamzia leh hnam incheina chenin nasa leh zuala short Film leh Documentary film hmanga ram dang te hmuh theih tura pho chhuak turin a chah a, Mizoram chu ram dang te entawn tlak khawpa election (inthlanpui) laia political party leh mipuiah buaina awm lova, boruak muanawm tak hnuaia inthlanna nei thin an nih dan te sawi chhuakin, India ram mai pawh ni lo, khawvel hriata film hmanga puanzara tlak a nih thu a sawi bawk.

Films Division East Zone Director Pu Joshy Joseph chuan film lama thiamna hrang hrang nei ten he workshop chhung hian zirtirna an pek tur thu sawiin, chhimtuten he hun hi an hlawkpui ngei a rin thu a sawi a. Mizoram Sawrkar hnuaia Information & Public Relations Department nena 2014 a Workshop neih tuma Workshop a tel te film siam ‘Tranquility’ chanchin sawiin he film hian Mizote chin dan tha, Aizawl khawpuia tul lova motor horn hman loh chu mawi takin a tilanga, ram pumah he film katlangin Mizoram chanchin a tha zawngin a darh a ni, a ti.

March 11 atanga ni 20 thleng awh tur workshop ah hian film scripting, shooting, sound mixing leh editing te zirtir anih dawn bakah MIFF 2020-a Award lo dawng tawh film engemawzat thlir ho a ni dawn a. Workshop a tel te hian film 2 an siam dawn a ni.

He workshop hi Ms. Anumol, South Indian lemchan thiam chuan hun a hmanpui bawk.

Hetiang Workshop hi Films Division in 2014 ah Aizawl ah leh 2016 ah Lunglei ah te I & PR Department nen tangkawpin an lo buatsaih tawh a ni.