Vawiin khan DC Conference Hall, Mamit-ah Dr. Lalrozama, IAS, District Bawrhsap, District Election Officer ni bawk chuan Final Electoral Roll, 2020 Mamit District a tlangzarh.

Vawiin Final Electoral Roll, 2020 tlangzarh tak hi Ni 01.01.2020 tehfunga neih niin Mamit District chhungah Voters 67819 awmin heng zingah hian mipa 34386 niin hmeichhia 33433 an ni a. Vote nei punna hi 1224 niin 1.84% a ni. Heng bakah hian Service Voters mipa 297 leh hmeichhia 4, an vaiin 301 an awm a ni.

Final Publication-ah hian Transit Camp a awm Reang Bru-te la chhiar tel niin tunah hian voters mipa 4619 leh hmeichhia 4368 an vaiin 8987 an awm mek a ni.

Mamit District chhungah hian Assembly Constituency pathum 1-Hachhek (ST) AC, 2-Dampa (ST) AC leh 3-Mamit (ST) AC awmin 1 Hachhek (ST)-ah hian Zamuang chu vote nei tamna ber niin 1184 a ni a. Vote nei tlemna ber hi Sotapa niin vote nei mi 126 an awm a ni. 2- Dampa (ST)-ah hian W.Phaileng Dinthar Veng- I chu vote nei tamna ber niin mi 956 vote nei an awm a. Zopui khua chu vote nei tlemna ber niin vote 52 a awm a ni. 3- Mamit (ST)-ah hian Damparengpui- II chu vote nei tamna ber niin vote nei mi 1154 an awm mek a. Dilzawl chu vote nei tlemna ber niin vote nei 159 an awm a ni.

Vawiina Final Electoral Roll Publication tlangzarh tak hi Mamit District chhunga Recognised Political Party pathum, BJP, Congress leh MNF Party te hnenah a copy hlan an ni a. He hunah hian Mamit khawpui chhunga tlawmngai pawl hrang hrang aiawhte, khawtlang hruaitute leh Election Officials-te an tel a ni.