Mizoram Technical Education Service Association (MITESA) chuan vawiin khan Tourist Lodge, Chaltlang ah Annual General Conference 2020 an nei a, Higher & Technical Education Minister Dr R.Lalthangliana’n a hmanpui.

Khuallian Dr R.Lalthangliana chuan thusawiin tunlai hunah department hrang hrangah technical mi pawimawhna a langsar tual tual a, chumi chherchhuaktu an nih avangin MITESA member te chu tan la sauh sauh turin a chah. Mizo te danglam bikna tak chu thil kan thiam chak hi a ni tiin Minister chuan chumi themthiamna hai chhuak tur chuan mithiam tak tak ten ram leh hnam tan an ngaihtuahna hmang turin a fuih bawk. MITESA-in an mamawh leh harsatna an sawi te chu Minister chuan chhangin sawrkarin ngun taka ngaihtuah chungin a lo bawhzui sak zel tur thu a hrilh bawk.

Khual Zahawm Er C.Thanseia pawhin thu sawiin technical education pawimawhzia leh a changtlun zelna tura sawrkarin a tul anga a ngaihtuahsak a tul thu te a sawi lang bawk.

MITESA Annual General Conference hi President Er K.Zodingliana’n a kaihruai a, khuallian te thusawi bakah Secretary Er C.Lalbiakchhawni hnena atangin report ngaihthlak a ni bawk.

MITESA hi technical education lama hmasawn theih nan kum 2005 ah din a ni a, tunah hian member 48 an awm mek a ni.