Vawiin khan  State Guest House's Conference Hall-ah Mizoram Finance & Accounts Service Association(MFASA) chuan an pawl khawmpui vawi 25-na an hmang a. He hun hi Finance Commissioner Pu Vanlal Chhuanga chuan khuallian niin a hmanpui a ni. 

Finance Commissioner Pu Vanlal Chhuanga chuan sawrkar hnaah service tha bik an awm loh thu sawiin khawi service-ah pawh mahni hna tha taka thawk a piang chu sawrkar tana chhawrnahawm,mipui tana malsawmna leh mi chhuanawm a ni mai a ni a ti. Sawrkar sum vawn that, hman dan leh chinfel hna thawktu an nih angin  MFASA member te chu  an hnathawhna hmunah an fimkhur zual bik a ngai nia a hriat thu a sawi a. Sum awmna hmuna hnathawk an nih avangin sum hmanga thlemnaah fimkhur lehzual a pawimawh bik hle a ni a ti a. Finance & Accounts Service officer te chu a chhe tur ven hna thawktu, sawrkar ruhrel pawimawh tak an ni tih a sawi a. An hnathawhah chiang hle turin a chah a ni. Tunlai hmasawnna thang zelah Computer hmanna a pung chhova, IT thiamna mamawhna a sang zela. Chuvangin Finance Department a thawkte phei chuan IT thiamnaah te intuaithar zel an mamawh tel tih a sawi bawk a ni.

Mizoram Finance & Accounts Service Association, Annual General Conference -2019 hun thenkhatna hi Pu Ramchuana, President, MFASA chuan a kaihruai a. Secretary leh Finance Secretary, MFASA te hnen atangin report ngaihthlak a ni a. Chawhnu lamah Pawl hmachhawp rel na hun leh Pawl hruaitu inthlanna neih a ni. Tun dinhmunah MFAS sanctioned post zat chu 90 a ni a, post 63 hnawhkhah niin post 27 hnawkhah lohin a awm mek a ni.