Vawiin hian Serchhip Town Sanitation Task Force te chu DC Meeting Hall ah an Chairman Pi Sangchhin Chinzah hovin an thukhawm a, September ni 6 a Open Defecation Free Plus Preliminary Declaration an lo puan tawh chu sawiselna pakhatmah a luh loh avangin vawiin hian Final Declaration an siam, district khawpui fai ber lawmna ropui tak ni 9th October, 2019 a neih an rel.

Pi Sangchhin Chinzah chuan, Serchhip in district khawpui fai ber lawmman a dawng chu thil chhinchhiah tlak, hriatreng tawh tur thil a nih thu a sawi a. He lawmman ropui tak kan dawn theihna chhanah mimal tumah kawh bik tur awm lovin Serchhipa cheng khua leh tui zawng zawng, Village Council zawng zawng, tlawmngaipawl zawng zawng, sawrkar hnathawk zawng zawng; mitin inpekna vang a ni, a ti a. Lawmman dawn ringawt hi kan tum ber leh kan lawmna a ni tur a nilova, faina nghet taka nunpui hi kan thiltum zawk a ni tur a ni, a ti. Bawrhsap chuan, a huhova faina hnatlang neia thawk reng chungin mahnia kan awmin kan hlamchhiah leh hlauh thei tih a sawi a, mitin mahni inena, mite entawn tlaka nung theuh turin a chah a ni.

Meeting-ah hian Pi Vanthangpuii, DUDO chuan September ni 6, 2019 a ODF Plus khawpuia Serchhip lo inpuan tawhna (preliminary declaration) kal zelah dan anga nitin chanchinbu pahnih Serchhip Times leh Lamkal Daily a puanzar a nih thu te, hun tiam chhunga sawiselna engmah dawn a nih loh thute a sawifiah hnuah; Chairman Pi Sangchhin Chinzah chuan Village Council aiawh members te chu ODF Plus-a an inpuan lohna chhan tur harsatna nei an awm leh awm loh a zawt nawn leh vek a. Harsatna nei tumah an awm loh avangin Open Defecation Free Plus Final Resolution chu a sign ta a ni.  He inpuanna hi thuneitu sang zawkah thlen a ni anga, dan angin an la rawn endik leh dawn a ni.

Meeting chuan 9th October, 2019 nilaini ah District khawpui fai ber lawmna leh Cleanliness Week, 2019 kharna inkhawm Serchhip Auditorium-ah ropui taka neih a rel a. Programme hman dan tur leh he huna thilttih tur pawimawh te an sawi nghal a ni.