Rural Development Department buatsaihin vawiin khan Sateek Community Hall ah Mahatma Gandhi piancham 150-na hriatreng nan Shyama Prasad Mukherji RURBAN Mission (SPMRM) kaltlanga Aibawk RURBAN Cluster hnuaia khualzin hip thei tur hmalakna Eco-tourism activity hrang hrang hawn a ni a. Rural Development Department Minister Pu R. Lalruatkima'n khuallian niin a hawng a ni. Minister hi Bamboo Link Road Board Vice-Chairman Pu Ramthanmawia, MLA in a tawiawm a ni.

He hun hmanpuitu khuallian Pu Lalruatkima chuan India hnampa Mahatma Gandhi piancham vawi 150-na denchhena Sawrkar Laipuiin tourism hmasawnna tur leh mipuite inpawhtawnna tur ruahmanna tha tak a siam chu lawmawm a tih thu a sawi a. Mizoramah hian RURBAN cluster pali kan neih thu sawiin RURBAN cluster kan neih hmasak pahnih Aibawk leh Thingsulthliah ah te tha taka hna kalpui a nih avangin Sawrkar Laipuiin cluster dang pahnih Khawzawl leh East Lungdar RURBAN cluster min pek belh leh a, a aia tam nei turin tan lak chhunzawm zel tum a ni tiin, Rural Development Department officials te bakah RURBAN cluster hnuaia khawtlang hruaitute leh khawtlang mipuite inpekna avangin kan hming a tha a ni a ti a, lawmthu a sawi a ni.

Minister chuan Eco-tourism project chuan Aibawk RURBAN cluster tan malsawmna thlentu a nih a beisei thu sawiin khualzin thahnem tak a hip theiih nan thildang tihbelh tur te pawh ngaihtuah zel a tul thu a sawi. Khualzin hip thei tura inphochhuah a pawimawh tih sawiin thalaite bakah khawtual mite tan sum lakluhna hnar tha tak a ni thei a ni a ti a, hnamdangte hmusit lova thiana siam thiam a pawimawh dawn a ni a ti a, hemi atan hian kan rilru leh hawiher a tul dana her rem thiam a pawimawh a, mikhualte hawihhawm taka dawnsawn a pawimawh dawn a ni a ti bawk.

Aibawk RURBAN cluster hi Mizorama SPMRM kalpuina hmasa ber a ni a. Kum 2016-2017 atang khan Aibawk RURBAN cluster hnuaia khaw hrang hrang 11-ah hna hlawm chi hrang hrang 16 kalpui a ni a, chung zinga hlawm khat eco-tourism hnuaiah activities hrang hrang kalpui a ni a. Chung zingah chuan Sateek khua a Lianphunga Bung tlawhtu ten hmanhmawh lova chawlh hahdamna hun an neih theih nan Camping Ground siam a ni a, camping package hi lei theih niin he package hian camping gear leh service chi hrang hrang a keng tel a ni. Sateek ah tho hian hiking trail siam niin sava leh rannung chi hrang hrang engemawzat he hiking trail huamchhungah hian hmuh tur a awm a, Sateek ah tho hian Mizorama cycling track hmasa ber siam a ni bawk a ni. Phulpui khaw hmingthanpui Zawlpala Thlantlang pawh a tlawhtu te tana awlsam zawk nan khawthlirna "Top View" chhawnghnih a sang sak a ni a, a panna kawng pawh chequered tiles leh vawnban te nen siam niin Puk Seki panna kawng pawh RCC a siam that a ni bawk. A hrechiang duh tan Aibawk BDO Office (contact:9862355288) emaw Zosang Adventures, Dawrpui (contact:8794717678) ah te zawhfiah theih reng a ni.

Vawiin inkhawmah hian "150 Years of Celebrating the Mahatma" denchhena Aibawk RURBAN Cluster huamchhunga zirlaite intihsiakna Painting Competition (Middle School) leh Essay Writing Competition (High School) a titha te hnenah lawmman sem a ni a. Painting Competition a lawmman dawngtute chu - Pakhatna : Isak Malsawmtluanga, Class-VII, Govt. Melriat M/S, Pahnihna : R. Vanlalhriatrenga, Class-VIII, Govt. Melriat M/S, Pathumna : Lalnunsiama, Class-VIII, Govt. Melriat M/S te an ni a, Essay Writing Competition a lawmman dawngtute chu - Pakhatna : Lalrinsangi, Class-X, Govt. Aibawk H/S, Pahnihna : Lalrinfela, Class- IX, St. Francis De Sales School, Sateek, Pathumna : Lalnunpuia, Class-X, Govt. Aibawk H/S te an ni.

Vawiin Aibawk RURBAN Cluster hnuaia Eco-tourism activities hawnna inkhawm Sateek Community Hall a neih ah hian Pu V. Lalsangliana, Addl. Secretary, Rural Development Department in mikhual lawmna thu a sawi a, Pu Remlalliana Hnamte, BDO in an hmalakna te sawifiahna hun a hmang a, Pu Paul L. Khuma, Under Secretary, Rural Development Department hnen atangin Aibawk RURBAN Cluster hnuaia Eco-tourism kalpui dan chi hrang hrang ngaihthlak a ni a, Pu CC Lalchhuangkima, Deputy Secretary, Rural Development Department in lawmthu sawina hun hmangin hnu a khar a ni.

Sateek Community Hall-a hun a hman zawh hnu ah Minister hian Phulpui tlawhin Phulpui Eco Estate lungphum a phum nghal a ni.