Tuna Aizawla cham mek 13th Finance Commission Chairman Dr. Vijay Kelkar leh ama ruala lo kal Commission member leh officials dangten Mizoram Governor Lt.Gen. M.M. Lakhera chu nimin tlai khan ama chenna Raj Bhawan-ah an kawm.

 

 

Finance Commission hotute hnenah Governor chuan Mizoram-in hmasawnna atana thil mamawh nia a hriatte a hrilh a. Mizoram state mau leh ramngaw lama a hausakna tangkai zawka hman theih dan te, kawngpui leh inkalpawhna tha zawk, tui thianghlim sem, hydro-electric project kalpui mek te tih puitlin, zirna sang zawk lam leh Mizorama Sainik School din theih dan turte Governor chuan a sawipui a ni.

Finance Commission Chairman chuan India ram state zawng zawng tlawhchhuah vek an tum thu sawiin Mizoram dawtah Meghalaya leh Bihar an tlawh nghal tur thu a hril a. 13th Finance Commission chuan Mizoram a ngaih pawimawh thu leh tuna Mizoram Chief Minister ni mek Pu Lal Thanhawla pawh Finance Commission member lo ni thin tawh avangin Mizoram chu an ngainat zual thu te Governor a hrilh bawk.

Nimin tlai vek khan MIzoram Governor chuan Dr. Vijay Kelkar leh a thawhpuite chu Raj Bhawan-ah zanriah a buatsaih sak a. Mizoram Chief Minister Pu Lal Thanhawla leh a thiannu Pi Lal Riliani bakah Ministers leh sorkar officials pawimawh engemawzatin zanriah hi an kilpui a ni.

 

 

{mosimage}