Aizawl, the 10th February, 2014 : Vawiin chawhma khan Finance Commissioner Pi Lalnuntluangi Tochhawng hovin a Office Chamber ah Finance Secretary Pu F.Vanlalruata leh Sawrkar mi pawimawh dang te chuan February 26 leh 27 a MIzoram rawn tlawh tur 14th Finance Commission lo mikhual dan tur chungchang an rel a.
Meeting ah hian State khualtha te lo hmuah dan tur te, an thlenna tur ruahhmanna, an chamchhunga venhimna kalpui dan tur te leh Official meeting neih chhoh puih dan tur te bakah thil pawimawh tak tak te rel a ni.
14th Finance Commission hian February 26 chawhnu dar 3 atanga dar 4 thleng Local body hrang hranga hruaitu te a kawm dawn a. Hemi ni vek tlai dar 4 leh dar 4:45 inkarah Political Party hruaitute an kawm hnu in sumdawng pawl hruaitute kawmna hun tlai 4:45 leh dar 5:30 inkar ah an nei leh ang a.Finance Commission lo zin chhan pawimawh ber, Commission term chhunga Mizoram sum leh pai dinhmun sawi hona chu February 27 chawhma dar 9 atangin Mizoram Council of Ministers te nen neih tura ruahman a ni.
14th Finance Commission(14th FC) hi October 31, 2014 hmaa rawtna leh ruahmanna peih fel hman tur a beisei a ni a. 14th FC rawtna leh ruahmanna hi pawm a nih chuan 1st April, 2015 atanga hman tan niin kum 5 chhung hman a ni ang.
