Labour, Employment & Industrial Training Minister, Pu Lalrinmawia Ralte chuan a department enkawl hnuaia mi Industrial Training Institute chu vawiin chhun khan a tlawh a, Labour & Employment Director, Pu Biaktluanga’n tawiawmin, he Institute dinhmun tlangpui a hmunah an en a ni.

Minister hi ITI Principal leh a thawhpui ten lo dawngsawngin, a hmunhma, class-room leh an hmanraw neih te chipchiar takin an enkual a ni. ITI-in a mamawh hrang hrang te leh zirlai ten an harsatna tawhte Minister hnenah hian an lo thlen a. Minister chuan ITI thuamthat kawnga theihtawp chhuah a tum thu sawiin, zirlai te chu eizawnna tlak thiamna chhar chhuak thei ngei tur leh chhawr tlak nghal tura zir turin a fuih a ni.

Tun dinhmunah ITI, Aizawl-ah hian trade 20-ah zirtirna pek a ni a, zirlai 370 awmin instructor 33 an awm mek a ni.