Vawiin khan Finance Department buatsaihin Administrative Training Institute, New Secretariat Complex-ah Training on Computerization of Treasury and Payment by Cheque System neih a ni a. He Training hi Mizoram Treasury Manual (MTM) leh Receipt & Payment Rules te sawrkar office hrang hrang ten an hmelhriat nan leh Bill hrang hrang siam dan an hriat theih nan a tih a ni.

Hetianga Bill hrang hrang siam dan thar, Bill Form thar hman a ngaih nachhan hi Mizoram a Treasury hrang hrang ten tuna Bank-a Bill an thawn thin tihtawp a, a aiah Cheque a Bank atanga pawisa lakchhuah tura ruahman a nih dawn tak vang a ni a, a bul tan nan Aizawl South Treasury leh Aizawl North Treasury bikah chauh October 1, 2011 atanga tan tura ruahman chhin a ni.

Khawvel changkang chho zelah Mizorama kan Treasury te pawh tih changkan zel a ngai tawh a, India ram hmundanga an tih ang te pawh entawn ve zel a ngai bawk a, Aizawl South Treasury bikah pawh Treasury Computerization tih mek a ni. Hei pawh hi October 1, 2011 atanga hman tan tura buatsaih a ni bawk. He Treasury Computerization atan hian CGA leh NIC te siam Software, COMPACT System, hman a ni a, India ram State zingah chuan COMPACT hi Mizoram hian a hmang hmasa ber a ni.Treasury te computerized a nih avang leh Bill System aiah Cheque system hman a nih dawn tak avang hian kan Bill form leh a siam dan thlak a ngaih tak nual avangin Training hi buatsaih a ni ta a ni.

Training hi Pu Vanlalnghaka, Addl. Secretary, Finance Department in a kaihruai a. Treasury Payment by Cheque System hi Mizoram tan thil thar chhinchhiah tlak (landmark) a ni tih thu a sawi. Pu V.L. Thlanawma, Treasury Officer (S) chuan hneh takin he system hman dan tur, a tangkai leh awlsam dan leh record vawn chungchanga a fel fai dan te a sawifiah. He training ah hian department zawng zawnga Drawing and Disbursing Officers (DDO) leh Cashier te an tel vek a ni.

Training hi Aizawl North Treasury hnuaia Department DDO leh Cashier te tan naktuk hian neih chhunzawm a ni ang.