Finance Minister Pu Lalsawta chuan,  Sawrkarin  sum renchem tura hma a lakna kawngah Department thenkhata a taka hnathawk ngei, thil tih felhlelh avanga hlawh la theilo an ni awma sawi chu Finance lam atang chuan engmah tihfel loh leh khawtlai a awmlo a ni, a ti.

He thu hi Pu Lalsawta chuan vawiin khan a office chamber-ah Press mite hmaah a sawi a. MR rawih a taka awm ngei leh ngei loh chhui chian nana  hmalakna kal zelah Planning Department chuan Muster Roll (MR) employee nei zawng zawng Department te chu an MR te hming, address, bakah anmahni tihchianna tur  EPIC  Xerox copy te thehlut theuh turin a ti a. Hei hi Department thenkhat thehlut mai theilo an awm avangin a hun pawhsei sak an ni, Pu Lalsawta chuan a ti a. Finance Department chuan a thawk ngeite, Epic neite chu hlawh pek zel kan duh a, keimahni lam atang chuan pending kan neilo, a ti. He thil hi kanram leh hnam tana pawimawh tak a nih avangin sawrkar chuan dik thei ang bera tih chhoh zel a tum a ni, a ti a. Tun dinhmunah Planning Department in a chhut danin MR list thehluh tawh chin atangin kum tin Rs vbc 59.63 sawrkarin a hum thei tih Minister chuan a sawi a ni.

Finance Minister chuan, sawrkar hnathawk hlawh atana Budget tam ber hman pawh hi sawrkar duh dan a nilo, a ti a. Tuna MR tih tlem tih pawh hi a hotulu atangin I tan ang u, tiin a takin hma kan la mek a ni, a ti a ni.

Finance Minister hi Pu KS Thanga,Parliamentary Secretary leh Dr.C. Vanlalramsanga IES, Secretary, Finance ten an an tawiawm a ni.