Vawiin khan ram hmun dangte rualin Mizoram-ah pawh ‘10th Statistics Day’ hman a ni a. He Ni puala inkhawm Aijal Club-a neihah Finance & Planning Minister Pu Lalsawta chu Khuallian niin Parliamentary Secretary Pu KS Thanga chu Khualzahawm a ni bawk. Kumin Statistics Day thupui-ah ‘Agriculture and Farmers’ Welfare’ hman a ni a, Dr. C.Vanlalramsanga, Secretary, Planning & Programnme Implementation Department chuan keynote address a sawi bawk.

Statistics Day 2016 hawnna inkhawm Economics & Statistics Director Pu Vanlalrema kaihhruaiah Khuallian Pu Lalsawta chuan Mizote nunphung mawl thin tak nena tehkhin chuan vawiina kum zabi 21-na nungdama hmang mek, khawvel hmasawnna leh thiamna hrang hrang tem phatute vanneihzia sawiin engkim awlsam em em, banphak veka awm tawhna khawvela cheng mekte chu an vanneih takzet a ni, a ti. Mizoram vanneih zualna chu mihring leh thlaiin a ngeih em em boruak, sik leh sa nuam tak kan nei te, Sap missionary-te zarah Mizo hawrawp changtlung tak neiin tawng pakhat hmanga kan awm thei te, a hnam ang zawng pawha thuawih thei tak leh thil tha nia hria chu bawh vak zel thin kan nih hi a ni a. Dinchhuah duh hnam leh theihtawp chhuah thin hnam nih chung pawhin Mizote chu vawiin ni thlenga tih fuh hleih theih loh kan nei a awm tlata a hriat thu sawiin Finance Minister chuan eizawnna mumal nei thei turin, awmze neia inthunun leh inrelbawl dan thlakna ‘New Economic Development Policy’ hmangin bung thar kan kai dawn a ni, a ti. Sorkarin ram hmasawnna kalpui dan tur a ruahmanna turah ram leh mipui dinhmun dik tak hriat a ngai a, statistics leh data chiangkuang leh felfai neih a pawimawh hmasa a ni, a ti. Mizorama ‘industry’ awm chhun chu sorkar hnathawh hi a ni a, ram hmasawnna hmel thlak danglam dawrh tur chuan sorkar leh mipuite tangkawpa bei a ngai a, lehkhathiam leh hna sang chauh thawk tur ni lo, mitinte tha leh thiamna chhawr thiam zawnga hmasawnna kalpui tum a nih thu sawiin Pu Lalsawta chuan a thlawna tanpuina sem lam aiin hnathawk tak tak duhten a zau thei ang bera an chhawrho theih tur infrastructure, khawl leh thildangte sorkarin a ngaihtuah sak zawk tawh dawn a ni, ti.

Khualzahawm Pu KS Thanga pawhin thusawiin India ram inghahna ber chu Agriculture a ni tih sawiin ramchhunga mihring cheng tluklehdingawn 1.21 zinga zaa 58% chuan agriculture leh a kaihnawih lamah ei an zawng a; India GDP 16.6% an thawhchhuah avangin sorkar laipui pawhin ngai pawimawhin Agriculture tihhmasawn nan kum 2016-17 Budget-ah cheng vaibelchhe 35,984 a dah nghe nghe a ni, a ti. Mizoramah chuan Agriculture leh a kaihhnawih atangin GSDC (2012-13) ah 18.95% thawhchhuah a ni a, kum 2014-14 survey-a landanah chuan chhungkua 73,826 chu Agriculture leh a kaihhawih lama thawk (zaa 25%) an ni tih a tarlang bawk. Mizoram kuthnathawktute harsatna sawiin Pu KS Thanga chuan boruak, sik leh sa inthlak danglam nasa leh chak lutuk te, inkalpawhna kawng nei that loh te, tui harsatna leh market neih that lohte a ni, a ti.

Keynote Address sawitu Planning Secretary Dr.C.Vanlalramsanga chuan India ramah ‘Statistics Day’ hi Statistician ropui Prof. PC Mahalanobis pianni June 29-ah amah hriatreng nana hman thin a nih thu a sawi a. Prof. Mahalanobis chu Indian Statistical Institute leh Indian Council for Agricultural Research dintu a nih bakah National Statistical Survey, Agricultural Statistic System, leh National Statistics Commission bultantu niin Chief National Statistician hmasa ber a ni a. Prof. Mahalanobis duan ‘Statistical Survey System’ phei chu khawvel ramdang tam takten an entawn thu a sawi bawk. Sorkar laipuiin agriculture leh a kaihhnawih peng hrang hrangte chu ngaih pawimawh hmasak berah neiin kumin Statistics Day thupuiah pawh ‘agriculture leh kuthnathawktu/loneitute hamthatna’ tih hmangin vawiin vek khan Vigyan Bhavan, New Delhi-ah Statistics Day hman a nih thu leh ‘Ministry of Agriculture & Cooperation’ ni thin kha ‘Ministry of Agriculture & Farmers’ Welfare’ tiin thlak a ni tih a tarlang bawk.

Vawiin ‘10th Statistics Day’ hmannaah hian Khuallian Finance & Planning Minister Pu Lalsawta chuan Directorate of Economics & Statistics buatsaih lehkhabu pahnih - 1).Estimates of State Domestic Product of Mizoram (2011-12 & 2012-13) leh 2). Report on Pooling of Central and State Sample Data of NSS 68th Round-Consumer Expenditure & Employment & Unemployment Survey, Mizoram - a tlangzarh a. Khualzahawm Parliamentary Secretary Pu KS Thanga chuan lehkhabu dang pahnih - 1).Meteorological Data of Mizoram(2015) leh 2). Medical Certification of Death, Mizoram (2015) - te a tlangzarh bawk.