Vawiin khan Finance Minister Pu Lalsawta chuan a department chan thenkhat – Planning & Programme Implementation, Taxation leh Law & Judicial Department hotute nen inrawnkhawmna Consultative Meeting pawimawh tak Secretariat Conference Hall-ah an nei. He meeting-ah hian Parliamentary Secretary Pu KS Thanga bakah MLA te - Pu PC Zoram Sangliana, Pu Lalrobiaka, Pu T.Sangkunga, Pu K.Sangthuama, Pu Lalthanliana leh Pu Lalruatkima te an tel.

Planning Department chuan sawrkar office a file che vel tikhawtlai lo leh awlsam zawk a file a kal kual zung zung theih nan hma an lak dante meeting-ah hian an tarlang a. File pawimawh dan a zirin ni khat thil thu a tihchhuah ngei ngei ngai chi te leh hun duh deuh tur chi te an thliar hrang a, kawl theih hun bi tuk an ruahman a ni.

Law & Judicial Department chuan Mizoram Lok Ayukta Act, 2014 pass a lo nih tawh angin Mizoram Chief Minister kaihhruaina hnuaiah Selection Committee din a ni tawh thu meeting-ah hian an tarlang  a.  Chairman leh member dang te ruat an nih thuai theih nan he Committee hian hma chak takin a la mek tih sawiin building hranpa sak a nih hmaa an awm lailawkna tur pawh ruahmanna siam a ni tawh tih meeting-ah hian an sawo bawk.

Taxation Department agenda pawimawh zingah mipuite phur ti rit belh chuang lova chhiah atanga sawrkarin sum tam zawk a hailuh theih dan an sawiho a ni.

Meeting hi nilenga neih niin Department hrang hrang pathumte agenda hi a hranpa a uluk taka ngaihtuah leh sawi ho a ni a. MLA te bakah hian Commissioner, Secretary leh Department official pawimawh tak tak an tel a ni.