Mizoram Audit & Accounts Service Association (MAASA) chuan vawiin khan Aijal Club ah 28th General Conference 2015 an hmang a, Finance Minister Pu Lalsawta’n a hmanpui a ni.

MAASA member te hnenah chuan sum hman dan endik uluk a pawimawh dan sawiin khuallian Pu Lalsawta chuan Accounts & Treasuries a thawk te chu a dik lo lai siam thatu an nih avangin an hnathawhna ah midangte tan harsatna siam lovin, dik lo leh fel lo te siamthat puia, kawng awlsam leh thazawkte kawhhmuh thiam turin a chah a, Sorkar sum hmandan mai bakah kohhran leh NGO hrang hrang te sum hman dan endikpui turin anmahni emaw Accounts & Treasury mi leh sate emaw an hman thin thu a sawi a. Charter Accountant ten sum leh pai dinhmun an endik thin kawnga thil tam tak an hmuhhmaih thin a, chu chu siam dik turin sum an ngiat belh thin avangin Mizo zingah hemi lama rualawh a nat thu a sawi a. Charter Accountancy hi khawvel hian an mamawh a, hetiang lam thiam te tan chuan foreign lam thlenga hnathawhna a tam avangin zirlaiten hei hi hria in accountancy lam hi ngai pawimawh thei se tha a tih thu leh zirlaiah te pawh subject pawimawh tak zinga telh ve chi a ni a ti bawk.

Sorkar in sum lama harsatna a tawh mek chu hun rei tak atanga rawn in chherchhuan tawh anih avangin vawilehkhatah a siam dik nghal mai theih lova, sorkar in a tum dan leh a ruahman ang chuan kum thum kum li vel chhunga chinfel theih mai a beisei tih a sawi. Finance Minister chuan inthlahdah lova Pathian hmanrua ni thei tura thawkin harsatna leh thil fello nia a hriat ah chuan engmah in phihawh tir lovin dik leh tha a hriat ang chuan thawh mawlh mawlh mai tur a ni a, tumah dang beisei lovin ram leh hnam tana tha tur ah chuan mahni hmalakna a ke pen mai tur a ni a ti a, tluang tak leh puitling taka ram tana tha taka rorel thiam turin MAASA member te chu a chah a ni.

Vawiin a General Conference an hman na ah hian Pu C. Vanlalsiama, President in a kaihruai a, Pu Lalropara, Secretary leh Pu C. Lalnunnema ten report an pe a, pawl aiawh in Pu Hmangaih Johana, Vice President in ngaihhruina thilpek khuallian hnenah hian a hlan a ni.

MAASA member te hian an service rules chungchangah te, post ruak 36 a ranglama hnawhkhah an duh leh AMC in an office building him tawk lova thuchhuah an siamah chhiatna thlen hma ngeia Office Building thar Sawrkar in ngaihtuah sak se an duh tih Resolutions an passed nghal a, chawhnu lam ah rorel inkhawm in an chhunzawm a ni.