Vawiin chawhnu khan R. Dengthuama Hall, Mualpuiah Mizoram Football Association chuan Finance Minister Pu Lalsawta hovin tunhnaia Football a MFA hlawhtlinna hrang hrang lawmna inkhawm an buatsaih a, national level a lawmman latu football player te leh sorkar hotute, sports association hrang hrang hruaitute leh MFA inkhawmpuia palaite an tel a ni. 

He huna khuallian Pu Lalsawta, Finance Minister chuan sorkarin infiamna hmunhma hrang hrang a buatsaih hmang tangkaia thalaiten hlawhtlinna an chang chho chu lawmawm a tih thu a sawi a. MFA lehkhabu buatsaih, Football a hlawhtlinna hrang hrang tarlanna chu a tlangzarh nghal bawk.

Vawiina MFA in hlawhtlinna a lawmte chu - National Sub Junior champion  te, Khelo India champion te, National Junior a 2-na te, Santosh trophy a semi final a thlen te, Capt NM Football-champion te leh I League champion  te a ni. 

Chawhma lamah MFA general body meeting hawnna inkhawm neih niin an President Pu Lal Thanzara, I&PR Minister chuan kum kalta leh kum kal mek, tun season a hlawhtlinna hrang hrang an neihte chu football chhungkua, Zone leh District te leh MFA anga kan zavaia tanrualna rah a ni, a ti a. Football hmasawnna atana MFA in mamawh hrang hrang a neihte sorkarin a pek thin thu leh sorkarin an hmunhmate phal taka MFA an hmantir thin avangin MFA President chuan Mizoram sorkar chungah lawmthu a sawi bawk a ni. 

Pu Lalnghinglova Hmar, MFA Honorary Secretary pawhin MFA hmalakna report pe-in kumin hi Mizoram Football tana golden year a ni, a ti a. Kum 2014 Santosh Trophy-a Mizoram a champion hnua hlawhtlinna hrang hrang an neih te tarlangin, India national team hrang hranga Mizo thalai hmuh tur awm reng te chu Football a hma kan sawn zia lantirtu niin a sawi. 

MFA hruaitute leh District hrang hranga Football hruaitu kalkhawmte chuan ngaihtuahho tura thu chhawpchhuah agenda hrang hrang an rel a. Football hmasawn nana District FA titha te hnena lawmman pek chungchang te, players registration mumal lehzuala kalpui dan tur chungchang te leh DFA hrang hrangin MFA puihbawmna an dil thenkhat te chu pawm a ni.

Attachment

  • Loading attachment...