Assam Rifles leh Mizoram Zirlai Pawl (MZP) thawhhonaa Assam Rifles Motivation Tour a kal tur College zirlai mi 30-te chu tukin zing khan Sipai Lammual atangin khuallian Finance Minister Pu Lalsawta chuan a vailiam.

Minister Pu Lalsawta chuan Mizorama a vawikhatna atan MZP leh Assam Rifles tangkawpa Motivation Tour buatsaih a ni chu lawmawm a tih thu a sawi a. Tour-a kal turte chu an kalna hmuna thu thlen tur pawimawh tak tak an neih a rin thu sawiin, chung bakah chuan anmahni zingah inthununna tha leh inngeihna vawng reng tura a duh thu a sawi a. Hruaitute thu ngaichang zel tura chah telin, mihring chu nitin a zirtur nei kan ni tih hre reng chunga tour a kal zirlaiten thil tha leh tangkai an chharchhuah ngei a duhsak thu Minister chuan a sawi a ni.

Assam Rifle Motivation Tour-a kal turte thlahnaah hian Assam Rifles DIG 23 Sector Brigadier MS Mokha leh MZP President Pu L. Ramdinliana Renthlei ten thu an sawi bawk. He Motivation Tour hi kumin kum tira Assam Rifles in Mizorama zirlai naupangte tan National Integration Tour a lo buatsaih tawh zulzuia Mizorama NGO hrang hrangte tana tour buatsaih zui zel a tumna bawhzuina hmasa ber a ni.

Tour hian 19^th atanga 25^th February chhung awhin, Silchar, Shillong leh Guwahati a sipai hmun an tlawh ang a. Govt. T. Romana College, Govt. Johnson College, Govt. Kolasib College, Govt. J. Thankima College, Govt. Aizawl North College leh Govt. Saitual College atang te in an vaiin zirlai thlanchhuah bik mi 30 an kal a ni.