Vawiin khan Mizoram Police Traffic Branch bultumin thuthar thehdarhtute nen Aizawl Press Club-ah Road Safety chungchanga thil pawimawh inzirtirna hun neih a ni a. Information & Public Relations Director Pu David L.Thangliana chu khuallian a ni.
Pu David L.Thangliana chuan media-te pawimawhzia sawrkarin a hria a, Aizawl traffic tawt lutuk ti ziaawm tur leh motor accident pumpelh thei turin mipui hnena a zau thei ang bera awareness pe theitu chu media-te an ni, a ti a. Heng harsatna kan tawh te hi tun atanga a siam that dan kan zawn loh chuan hun lo kal zelah buai a zual tulh tulh dawn tiin Mizoram Journalist rualte leh traffic police-ten road safety chungchang sawihona hun an buatsaihah zalen taka tul leh tha an tih apiang sawi a, hemi kawnga Mizoram mipuite sawt tlanna tur rawtna tha te siam turin a fuih a ni.
Aizawl District chhungah hian July 2017 thleng khan mimal leh sawrkar motor belhkhawmin 1,26,470 a awm a, chung zinga 60-70% chu Aizawl khawpuiah a awm a, chu chu chawhrualin lirthei 88,529 a ni. Aizawl District Transport Office-ah nitin lirthei thar 30 atanga 40 in register thin ang an ni. Aizawl Municipal area chhungah motor tlan theihna kawngpui belhkhawmin 300kms vel a ni a, traffic police hi nitin 200 bawr vel duty thinin traffic police pakhatin lirthei 300 atanga 400 inkar a vil thin ang a ni. Lirthei ke pahnih nei (2 wheeler) hi Aizawl District chhungah mimal ta 78,899 awmin sawrkarin 1285 a nei a, belhkhawmin 80,184 a tling. Aizawl khawpui chhungah bik hian chawhrualin a tlem berah 2 wheeler 50,000 bawr vel awm ang a ni.
Mizoram sawrkara CID (Crime) report-a a lan danin kum 2008 atanga 2016 thleng Mizoramah road accident vawi 988 a thleng a, mi 757 an thi. State road safety council chuan target insiamin kum 2020 ah chuan accident hi 50% a tih tlem a tum a ni. India ramah kum 2016 chhung khan accident tum 4,80,652 a thleng a, mihring 1,50,785 an thi. Heng zingah hian 2 wheeler accident tam berin car, jeep leh taxi in a dawt a, accident-a thi zingah pawh 2 wheeler avanga thi an tam ber bawk a ni.
Vawiin programme hi Traffic SP Pu C.Lalthanmawia’n a kaihruai a, Mizoram Journalist Association President Pu Vanlalrema Vantawl chuan thu sawiin Traffic Deputy SP Pu C.Vanlalvena’n road safety chungchanga thil pawimawhte a lem nena entirin a sawifiah. Sawihona hun tha tak hman zui niin Traffic Addl.SP. Pu Zasangzela’n lawmthu sawiin hun a khar a ni.
Attachment
- Loading attachment...
