Vawiin khan Mizoram Upa Pawl Aizawl South-II Area General Conference vawi 27-na, SMTC, Mission Vengthlanga neihah Finance Minister Pu Lalsawta chu khuallian niin hun a hmanpui. 

Minister chuan Mizoram tana thil tha tur ngaihtuah a ngaihven reng thin pawl hlu tak MUP kan nei hi kan vanneihna a ni, tiin Upa Pawl chuan an tawnhriat hlu takte hmanga ram khalhngiltu leh thurawn petu ni zel turin a sawm. Tuna MUP member-te zingah zirna leh eizawnna kawnga hlawhtling hmasa, harsatna tinreng paltlanga hlawhtlinna lo hmu tawhte an awm thu tarlangin, Pu Lalsawta chuan tunlai thangtharten anni atang hian zirtur tam tak an neih thu a sawi a. Sawrkar hmalakna NEDP hmangin sawrkar hna a innghat kher lova eizawnna ngelnghet thartharten an neih theih nan hma lak mek a nih thu Finance Minister chuan tarlangin, hengah te hian hlawhtling tur chuan remhriatna leh bultanna sum mai nilovin taimakna leh tumruhna a pawimawh thu a sawi a ni. Khuallian chuan kum upat avangin tuma tangkaina a tlem phah chuang ngailo tiin, thangtharte tan kum upa zawkte chu entawntlak annih reng thu a sawi bawk. 

Vawiina MUP Aizawl South-II Area General Conference-ah hian palai zinga mipa leh hmeichhia kum tam berte, Pi Lianthuami (85) leh Pu Saihleia (96) te hnenah khuallian hian chawimawina certificate leh pawisafai cheng zahnih a hlan bawk. MUP Headquarters President Pu RK Thanga leh thlengtu unit atangin Pu Nghaklianmawia ten thu an sawi bawk. Chawhma lamah rorelna hun neih niin, an thurel zingah Gas leh Petrol tihchingpen awm thin a lo reh theih nan leh, thingtlang leh Aizawl veng tin a Street Light-te tieng vek tura Sawrkarin hma la se an tih thu te, Mizoramah kutdawh an awm loh nana hmalak leh Signboard/ Poster a condom chungchang lang tam lutuk chu tih tlem te a tel a ni. 

MUP Aizawl South-II Area ah hian Unit pakua (Mission Veng, Mission Vengthlang, Tuikhuahtlang, Thakthing, Dam Veng, Venghnuai, Model Veng, Salem Veng leh ITI Veng) awmin, a vaiin member 2141 an awm a. Kum 2017-2018 chhung khan member boral ta mi 89 an awm a ni.