Nimin khan Bukpui Primary Health Centre (PHC) chuan Damdawiin fai inelna KAYAKALP hnuaia Kolasib District a PHC fai ber nihna an lawm. He hun hi bialtu MLA Pu Hmingdailova Khiangte in a hmanpui.

Khuallian chuan Bukpui PHC Daktawr leh Staff te thawhhona chu fakawm a ti a, Kum 2017 a Kolasib Districta Damdawiin (PHC) fai ber nihna an hauh chu a lawmpui takzet a ni tih a sawi. Hemi bakah hian Kum 2017 khan Bukpui khua chu Kolasib District a khaw fai ber dawttu an nih thu a tarlang a chu chuan Bukpui khua in faina an ngaih pawimawh zia a lantir a ni a ti. India hnampa Mahatma Gandhi a chuan "Thianghlimna hi Ram zalenna aiin a pawimawh Zawk" (Sanitation is more Important than Independence) tih thupui hmangin thianghlimna a ngaih pawimawhzia alo tlangau pui fo tawh a, Bukpui khawtlangin  a khua leh Damdawiin ang zawnga faina kawnga hming an chher chu thil chhinchhiahtlak tak a nih thu a tarlang a, hei hi khaw dang tana thil entawntlak tak a nih thu a tarlang bawk a ni. Khuallian chuan Bukpui khawtlang hruaitute leh mipuite thawhhona thatak chu thil chhunzawm tlak anih tu tarlangin KAYAKALP Award lawmpuinan sum fai a hlan bawk a ni.

He hunah hian Dr.Lalhlimpuia CMO, Kolasib pawhin thu sawiin Mizote chu hriselna kawngah tan kan lak a hun takzet a ni tiin heng AIDS, Cancer, BP Sang, Zunthlum leh natna dangte in Mizote chu min chimbuai nasa em em a, kan khawsazia, nunphung te kan in uluka zuk leh hmuam kan insumtheih a ngai a ni tiin thlum, al leh mawm ei chungchangah pawh insumtheihna kan mamawh thu a tarlang a. Hemi bakah hian ke a kal tam leh tui in tam te, tum khata chaw/thil ei teuh loa tlemte in  (Moderate) a zing zawka ei a pawimawh hle a ni a ti bawk. CMO chuan Damdawiin faina kawnga kan in el viau laiin Damlote enkawlna kawngah kan inthladah ang tih a hlawhawm hle a ni tiin  rawngbawlna rilru nena Damlote enkawl chhunzawm zel turin Bukpui PHC leh Staff te chu a sawm a ni.

Bukpui PHC hi Kum 2016 khan KAYAKALP ah hian pahnihna an lo hauh tawh a, tun dinhmnah Daktawr (Medical Officer) Pakhat leh Staff Nurse 2 an awm a, Male leh female Ward awmin, Khum 10 a awm mek a, hemi bakah hian Isolation Ward pawh awmin, He PHC hian Bukpui leh a chhehvela khua heng N.Chaltlang, Hlimen leh Thingthelh te hi a bial a ni.

He hunah hian Bukpui MO Dr.Roluahpuii bakah Lungdai MO Dr.Zairemi leh khawtlang hruatuite an tel tha hle a ni.