Champhaia Independence Day lawmna hmanpui tura kal Finance Minister Pu Lalsawta chuan nimin (14.8.2015) tlai khan Champhai Circuit House Conference Hall-ah Champhai khawchhunga Sorkar Office hotute kawmna hun a hmang. Minister hi Chief Controller of Accounts Pu Lalbiakthanga leh Pu K. Sanglawma, Commissioner of Taxes ten an tawiawm a ni.

Minister Pu Lalsawta chuan Sorkar Department hrang hrang thawktute thawhhona tha neih pawimawh a tih thu sawiin, Champhai a office hnathawk te pawh thahnemngai tlang taka an thawhho a beisei thu a sawi a. Duhna leh theihna a awm lai hian kan hmaa thawhtur leh hmalakna tur awmte chu tih mai tur a ni, a ti. Mizoram sum dinhmun sawiin Finance Minister chuan Sorkar laipuiin kalphung thar a duan angin sum kal dan leh hman dan phungah zir tur leh hriat ngai thil thar tam tak a awm thu leh, Sorkar hnathawkte pawn kalphung thar mil a thawh an thiam a, inzir belh tura rilru pawh siam thiam a tul a tih thu a sawi a ni.

Minister hova inkawmna hun hi Pu H. Lalengmawia, Champhai DC in kaihruaiin, Champhai chhunga Department hrang hrang hotuten an hmalakna leh harsatna te an sawi chu Minister chuan hmalak zel dan tur leh harsatna sutkian theih dan tur kawngte a sawipui a ni.