India Independence Day vawi 69-na chu ropui takin Aizawl-ah Chief Minister Pu Lal Thanhawla hoin Assam Rifles Lammual-ah vawiin khan hman a ni.

Chief Minister chuan thuchah sawiin he ni ropui takah hian India in zalenna a neih theihna tura sulsutu, thisen leh thlantui senga mi ropui tak tak, Pu Mahatma Gandhi te, Sardar Vallabhai Patel te leh midang chhuanawm tak takte zahna chibai kan buk a ni a ti a. Anmahni chawimawina leh inpektharna ni ah hmang turin mipuite chu chahin, vawiinah chuan ram zalen, mipuite rorelna democracy ram lian kan lo ni ta a ni a ti a. Keini Mizorama chengte pawhin ram tana inpek leh tharna atan hmang turin a chah bawk a. Chibing leh intihbik duhna rilru pu lova, Mizo te hi hnam khat kan ni tih i in theihnghilh ngai lovang u a ti. Mipuite leh ram hmasawnna turin rorelna dik kan kengkawh chho zel dawn a ni a ti.

Chief Minister chuan Mizoram sorkarin kawng hrang hranga hmasawnna tur programme a kalpuite tarlangin, mipuite himna leh dan leh thupek kenkawhna lam chu ngaihpawimawh hmasak a ni a ti a. Kan zavaia tanrualna avangin India rama State ralmuang ber niin kan inchhal ngam hial a ni a ti a.He remna leh muanna man to taka kan neih hi lungchhiat thlak takin ni 28.3.2015 ah HPC’D’ helten Zokhawthiang bulah Assembly Assurance Committee memberte lambunin kan police 3 min thah sak a, midang 5 an hliam bawk a ni a ti a. He thil tenawm tak hi kan dem tak zet a, remna leh muanna kengkawh turin hmaih awm loin khawng takin kan kal zel dawn a ni a ti. Kan police te kan thuam tha chho zel a, Aizawl City Surveillance Project Phase I pawh hawng tawhin, CCTVs te hmun pawimawh laiah dah mek a ni a ti.

Chief Minister chuan sorkar flagship programme NLUP pawhin hma a sawn chho zel tih sawiin,  chhungkaw 90,139 hnenah tanpuina pek tawh niin, chhungkaw dang 44,861 hnenah pek leh thuai an ni ang a ti a. NLUP duhkhawp lohna laite pawh siam that chhoh mek zel a ni a ti. Chief Minister chuan UNO hnuaia UNDP, UNIDO, FAO leh ILO te nen thawhona thuthlung ziah tawh anih thu tarlang bawkin, Central sorkar, Mizoram sorkar leh FAO nen technical cooperation lama inremna ziakin Rs.3.15 Crore kan dawng tawh bawk a ni a ti a. Tata Trust nen pawh inremna ziakin NLUP hlawhtlinna turin Rs.18 Crore an rawn chhunglut bawk a ni a ti.

Mizoram kawngpui inkalpawhna lam pawh PWD in thawkin, NEC leh NLCPR atangtein hmun hrang hrangah siam chhoh mek a ni a ti a. Mizoram State Roads - II Regional Connectivity Project leh ADB hnuai atangin khaw hrang hrang inkalpawhna tih changtlun mek anih thu a sawi bawk a. Kaladan Multi Modal Transit Transport Project thawh mek pawhin hma a sawnzel thu a tarlang bawk. Power supply tam zawk kan neihna tur leh aggregate technical & commercial loss tih tlemna turin chak taka hmalak chhoh mek a ni a ti a. Mizoramin Hydro power siamna tura lui thahnem tak a neihte hi hmang tangkai turin NEEPCO nen thawhdunna thuthlung ziah tawh anih thu leh a then thawh mekte leh la thawh hmabakte sawiin, lui hrang hrangina power  a siam chhuah theih zat te a tarlang a. RGGVY kaltlanga khaw 140 tihen anih tawh thu te a sawilang bawk a ni. Tui thianghlim tlan tur pek chungchangah kum 2014-15 chhungin NRDWP atangin khaw 52 tui pek tawh anih thu leh NEC leh NLCPR atanga project 7 kalpui mek a ni a ti. Faina lam chungchangah Prime Minister hmalakna ‘Swachh Bharat Mission’ pawh district tinah kalpuiin, Mizoram chu khawlaia daikal awm lohna ah siam tum a ni a ti.

Zirna lam sawiin, Pu Lal Thanhawla chuan kumin 2015 ah HSLC leh HSSLC ah nikum aia result a that zawk thu a tarlang a. School Education departementin State Learning Achievment Survey kum 2014-15 chhunga a kalpui tih a sawi bawk a. District tinah Polytechnics din chhoh mek a ni a ti. Hriselna lam sawiin, mipuiten hriselna tha an neih chu sorkar ngaihpawimawh hmasak berte zinga a mi a ni a ti a. Falkawna State Referral Hospital chu tih changtluna Mizoram Institute of Medical & Research ah hlangkaiin, kum 2016-17 chhunga zirlai 100 tal awm thei tura ruahmanna kalpui mek a nih thu a sawi a. District hospital te, cancer hospital te leh Mizoram College of Nursing te ti changtlung bawk tura hmalak mek a ni a ti. Thenzawla AYUSH Hospital tur pawh peih tep tawh a ni a ti.

Mirethei in neilo te tana an chenna tur BSUP leh JNNURM atangin Chite leh Lawipu ah in sak mek a nih thu Chief Minister chuan a tarlang a. Central project dang dang MGNREGS, IAY, BGRF,MzSLRM leh BADP te kalpui mek a nih thu a tarlang bawk a. Thing leh mau, hnim leh nungcha te humhalhna tur kawngah thing tiak phun chu kum 1999 atanga kalpui tawh a nih thu tarlangin, Pu Hawla chuan kumin 2015 thlengin thing tiak nuai 36 phun tawh a ni a ti a. Biodiversity Management Committee 221 din tawh a nih thu a sawi bawk.

Thalaite tana khawvel thar siamna kawngah Chief Minister chuan khelmual hrang hrangah phullem phah anih thute, multipurpose Indoor Stadium leh Table Tennis Hall te peih anih tawh thu a sawi a. Kumina 35th National Football Games ah Mizoram Teamin Gold medal an lak chungchang leh international leh National levela contact sports a thalai infiammiten medal engmawzah an dawn thute a tarlang a. Footbalah abika hma nasa taka kan sawn avangin FIFA leh AIFF ten min rawn ngaihvenna te chu a lawmawm hle a ni a ti a. Mizoram Youth Commissionin thalaite tan hmalain, mahni eizawnna an insiam theihna tura skill leh capacity development kalpui chhoh mek a ni a ti. Agriculture leh Horticulture lamah pawh nasa taka sorkarin hma a lak thu a sawi a. Loneimite hnenah buh chi tha chi te, vaimim chi tha leh pulse seed te sem a ni a ti a. Power Tiller te leh Tractor mounted Rotavator te man tlawma pek an nih thute a sawi a. NLUP hnuaia hmalak te bakah thei leh thlai leh spice chi te pek an ni a. Horticulture enkawlna hnuaiah chhungkaw 24,097 hnenah NLUP tanpuina pek an ni a ti. Zirchianna ‘Study on Development and Management on Land and Water Resources for Sustainable Agriculture in Mizoram’ tihah Japan International Cooperation Agency in project 27 a intodelhna tur Master Plan an thehlut a ni a ti a. Hei hian technology transfer lam a bitum ang a ti.

AH&Vety department hnuaiah NLUP dawngtu chhungkaw 37,047 an awm thu Chief Minister chuan a tarlang a. MULCO Complex, Thuampui, Aizawlah nitin bawnghnute 5000 litre sawngbawlna tur khawl Indigenous Milk Product Plant hawn anih thu a sawi a. Sericulture department hnuaiah NLUP dawngtu chhungkaw 2195 an awm thu a tarlang bawk a. Soil & Water Conservation department hnuaiah kum 2014-15 chhungin NLUP dawngtu chhungkua ten hmunphiah Rs.1,479/- lakhs man an hralh a ni a ti.

Chief Minister chuan Myanmar ram nena border trade neihna turin Zokhawthara Land Customs Station Union Minister in a hawn tawh thu a sawi a. Social Welfare department pawhin tanpui ngai rualbanlo, tar, damlo, hmeithai leh midang dangte hamthatna turin hma a la chho reng a ni a ti a. Serchhipa mirethei zawkte school kalna tur Tribal Ministry atanga din, Eklavya Model Residential School hawn tawh chu Saiha, Lawngtlai leh Chawngte ah te din tura hmalak mek a ni a ti a. Tribal hmeichhe zirlai naupangte tan hostel hmun hrang hrangah din tum mek anih thu Chief Minister hian a sawi bawk.

Food & Civil supply hnuaia ration cardte chu computerised vek tawh a ni Chief Minister chuan a ti a.Ei tur him tak leh thianghlim taka vawn that anih theihna turin a dahthatna kudam uluk taka siam chhoh mek a ni a ti a. Industry lama hmasawnna turin Zuangtui Industrial Area ah unit 25 tan hmun pek an nih thu leh Lengte ah hmun 10 pek a nih thu a sawi bawk a. Thenzawlah Mizoram Handloom Export Facilitation Hub pawh hawn tawh anih thu a tarlang bawk. Mizoram Liqour (Control & Prohibition) Act, 2014hman anih atangin kum 2014-15 chhungin sum Rs.4,58,93,981/- hmuh tawh a ni a ti. Local Administration Department hnuaiah General Basic Grant Rs.1,284/-lakhs Village Councilah pek tura hmalak mek anih thu asawi bawk a. Sorkar sum eirukna nuaibo anih theihna turin The Lokayukta Bill, 2014 pawh pawm a ni tawh a ti. Nupa inthen thulhah hmeichhiaten hamthatna an hmuhna turin The Mizo Marriage, Divorce and Inheritance of Property Bill, 2014 pawh Legislative Assembly in a pawm tawh bawk a ni a ti. Khaulzin mite hip turin adventure tourism te, rural tourism leh eco tourism ah te hmalak tum a ni Chief Minister chuan a ti bawk a ni.

Chief Minister Pu Lal Thanhawla chuan tlawmngai pawl hrang hrang, media leh kohhrante leh mipui nawlpuiin sorkar hmalaknate an thlawp thinnaah lawmthu a sawi a ni.

Vawiin Independence Day lawmnaa Hnam Puanzar chibai buktu parade contingent 29, band party 4 tiamin an awm a. An zingah hian ‘Armed’ contingent 5, ‘Unarmed’ 7 leh school contingent 13 an awm a.Armed contingent ah pakhatna 5th IR Bn niin, pahnihna 225th Bn CRPF leh pathumna 3rd Bn MAP ten lawmman an dawng a. Unarmed ah 1st prize Hrangbana college NCC, 2nd Govt Jahnson college NCC leh 3rd Aizawl North college NCC ten an dawng bawk a. Shool contingentah 1st Divine Interevention School, 2nd Govt Mizo HSS leh 3rd Oxford School ten an lawmman an dawng bawk a ni.

Hengte bakah hian zirtirtu tha zual thlan chhuah mi 3 te hnenah State Award to Meritorious and Outstanding Teachers hlan ni bawkin, 1. Pu H.Ngurthansanga, Lecturer, Govt Mamawii Higher Secondary Scholl, 2. Pu V.Lalrinmawia, Headmaster, Govt Middle School, Theiriat, Lunglei leh 3. Pu R.Pensionthanga, Headmaster, Govt Primary School, Zonuam, Aizawl te hnenah Chief Minister in a hlan bawk a. Hemi bakah hian kum 2011 a India ram Chhiarpui neihah khan Mizoram sorkara thawk mi 15 te hnenah Census Medal, 2011 hlan an ni bawk.

Vawiin Independence Day a lawmman dawngtu dang te chu President’s Medal for Distinguished Service ah Pu Sher Singh Thapa, Addl SP, ACB, Police Medal for Meritorious Service ah Pu R.Vanlalduata, Inspector, Aizawl DEF leh Pu H.C.Sangzuala, Inspector, 1st Bn MAP ten an dawng bawk a ni.