Vawiin chawhma dar 10:30 khan Khawtetlang Field, New Serchhip-ah Independence Day vawi 69-na ropui taka lawm a ni a, Pu P.C. Lalthanliana, Social Welfare, Horticulture, LAD etc., changtu Minister chuan khuallian niin a hmanpui. He India ram zalenna champha lawmna niah hian March Past Contingent 15 (Armed Contingent-2, Unarmed Contingent-1 leh School Contingent-12) an awm a, SSA Mission, Serchhip Pipe Band in India hnam hla an rem bakah March Past neih laiin rimawi an tum bawk a ni.

Minister hian Independence Day lawmna hmun a thlen veleh hian India hnam puanzar a pawt pharh a, hemi zawh hian March Past nei tur parade contingent 15 te chu endikin Parade Commander Sub-Inspector Vanlalvena, 3rd Batallion M.A.P kaihhruai March past parade contingent te chibai buk a chhanglet nghal bawk a ni.

He ni lawmnaah hian khuallian chuan Serchhip mipuite chu Zalenna chibai a buk a, India ram in zalenna a neih theihna tura tha leh zung senga an nunna hial lo hlan tut e zawng zawng chawimawina ni anih tel avangin ram tana inhlan te inpekna hre thar leh turin a sawm a, Sawrkar tha leh rintlak, dik leh felfai nei tura theihtawp chhuah zel tura a intiam thar leh thu a sawi bawk.

Khuallian Minister chuan Sawrkar Flagship Programme NLUP chu chak taka kalpui zel anih thu sawiin Mizoram tihhmasawnna tura ruahmanna te a hlawhtling chho mek zel a ni a ti a, NLUP kaltlanga tanpuina dawng mi 90,139 an awm tawh thu leh midang 44,861 pawh tanpuina pek leh thuai an nih dawn thu a sawi bawk.

Serchhip District a Sawrkarin hmasawnna hna kawng hrang hranga a thawh dan thenkhat tarlangin, Chhingchhip-Hmuntha kawngah NLCPR scheme hnuaiah Tuikum Lei dawh zawh anih tawh thu te, Chhingchhip-Thentlang kawngah NLCPR scheme hnuaiah tho Tuikual Lei dawh zawh anih tawh thu te a tarlanga, Asian Development Bank (ADB) sum hmanga Rs. vaibelchhe 259.20 senna Serchhip-Thenzawl-Buarpui kawngpui cheithat hna pawh chak taka thawh mek anih thu a sawi bawk.

Minister chuan Serchhip ah Polytechnic thar din tura hmalakna pawh tluang taka a kal zel thu a sawi a, Serchhip damdawiin JNM Hospital (District Hospital) tihchangtlunna tur atan DoNER Ministry ah proposal thehluh anih tawh thu te, Thenzawl-ah khum 50 awmna AYUSH Hospital sak mek pawh chak taka kalpui mek anih thu a sawi bawk. Horticulture Departmeny hnuaiah Serchhip District a loneitute tanpui nan Lungleizau-ah Centre of Excellence siam anih thu te leh Horticulture College atana hmun ruahman Thenzawl chu rei tak Sawrkar Laipuiin a pawmloh hnu in Mizoram Chief Minister hmalakna vang liau liau a tun hnaia pawm anih tak thu leh pawm ani tih hriattirna lehkha an hmuh tawh thu a sawi bawk.

Minister chuan Social Welfare Department kaltlanga hmalakna te tarlangin Ministry of Tribal Affairs atanga sum hmuh Rs. vaibelchhe 12 senga sak Eklavya Model Residential School (EMRS) Serchhip Kawlri-ah hawn anih tak thu leh District chhunga mirethei zirlai naupangte tan malsawmna tur anih ngei a beisei thu a sawi a, Saiha, Lawngtlai leh Chawngte a EMRS sakna tur pawh Ministry lamin sum hman phalna a pek tawh thu leh hna tan thuai anih dawn thu a sawi bawk. Social Welfare Department kaltlangin Serchhip, Lunglei leh Lawngtlaia Fish Hatchery siam nan Rs. Nuai 190 hmuh anih thu te, Lawngtlai Mampuia Chicken Hatchery siam nan Rs. Nuai 125 hmuh anih thu te leh Thenzawl High School-a Scheduled Tribe Girls Hostel sak mek anih thu te a tarlang bawk a ni. Hei bakah hian Local Administration Department hnuaiah RGPSA Scheme kaltlangin Village Council hrang hrang hnenah a thawh khat nan computer set 107 sem anih tur thu leh Village Council 26 thlanchhuahte VC House sak sak an nih tur thu te, khaw 300 Village Council te hnenah Resource Mobilisation Fund atan Rs. 50,000/- theuh pek an nih dawn thu te a sawi bawk.

Minister hian thu a sawi zawh ah March Past Parade contingent te hnenah lawmman a sem nghal a, a titha zualte chu : Pakhatna – Marian High School, Serchhip, Pahnihna – Lal Thanhawla Higher Secondary School, New Serchhip, Pathumna – Presbyterian English School, Serchhip te an ni a, parade contingent zawng zawng hnenah participation prize sem vek a ni.

Independence Day pual hian tukin (August ni 15) khan Old Age Home, Zoar Deprived Children’s Home, Adult Rehabilitation Centre leh Shalom Special School ah te Independence Day lawmna thilpek sem a ni bawk.

Independence Day pual inkhawm zawh anih hnu hian VIP at Home chu sawmbikte tan DC Bungalow ah neih a ni