Tukin dar 9:00 hian Lawngtlai YLA Ground ah India ramin zalenna a hmuh champha ropui taka lawm a ni a, Home Minister Pu R. Lalzirliana chu khuallian niin hnam puanzar a pawtpharh a. Parade Contingent 17 ten hnam Puanzar Chibai an bukna a chhanglet bawk.

Zalenna thuchah sawiin Pu R. Lalzirliana chuan, India ramin zalenna a hmuh champhaah hian Zalenna a awm theihna tura nunna hlan tute, ram hruaitu ropui tak takte chu hrerenga, remna leh muanna chawi nung zel turin kalkhawmte chu a chah a. Mizoram chhungah remna leh muanna vawnghim turin sawrkarin theihtawp a chhuah zel dawn a ni tih mipui a hrilh. Lawngtlai District chhungah pawh Sangau ah te, Vaseikaiah te leh Borapansury ahte Police Station sak mek niin, heng Police Station ah te hian Gypsy pek theuh an nih thu a sawi a, Thingkahah Police Battalion hmunpui tur sak mek a ni a ti bawk.

United Nations hnuaia Agency hrang hrangte nen tunah hian NLUP ah thawhhona siam mek zel a ni a, Lawngtlai District chhungah pawh chhungkaw 12377 te hnenah NLUP hi pek tur a ni, a ti. Miretheite tan kum kalta chhung khan IAY hnuaiah in 184 sak niin, MGNREG hnuaiah chhungkaw 27442 te chu ni 23 inhlawhna siamsak an ni, a ti bawk. Buh leh bar tharchhuah kawngah pawh Lawngtlai District in hma kan sawn zel a , kum 2014 chhung khan ram hectare 2453 a zauvah buh chin niin buhfai Metric ton 6213.8 tharchhuah a nih thu a tarlang bawk. Oil Palm pawh District a chhungkaw 2000 ten Hectare 2519 a zauvah an ching mek a, kumin chhungin Hectare 1100 a zau chinbelh tura hmalak mek ani a ti.

Mipui hriselna chawikan nan Lawngtlaiah Khum 50 awmna tur Hospital sakna tur DoNER atanga hmuh a nih thute, Civil Hospital OPD kumin chhunga luah theiha peih tum a nih thute, Health Worker Training School pawh kumin chhunga peih hman tum a nih thute kalkhawmte hi a hrilh a ni. Heng bakah hian kawng hrang hranga sawrkarin mipuite tana ruahmanna a siamte a tarlang bawk.

Hemi hnu hian Khuallian hian Parade a ti thate hnenah lawmman semna a nei nghal a, lawmman dawngtute chu; Unarmed Contingent ah Pakhatna – Downtown English School, Guide pahnihna – Ngurnunsangi English School, Scout & Guides leh pathumna Govt. Region High School NCC te an ni a, School Contingent ah Pakhatna – Don Bosco School Girls, pahnihna Ngurnunsangi English School, Girls te leh pathumna Downtown School Girl te an ni. Khuallian hian Independence Day puala Football inelna a Champion, College Veng Football Club hnenah lawmman a hlan bawk.

A lawmna pui ber YLA Ground a hman a nih hnu chawhma dar 10:15 Am khan Circuit House tualah ‘VIP’s at HOME’ sawm bikte pualin buatsaih leh a ni a, tukthuan an kilho nghal a ni.

Independence Day hmanna ah hian Pu H. Zothangliana, Parliamentary Secretary chuan khuallian hi a rawn tawiawm a ni.