India ramin zalenna a hmuh champha phak vawi 69-na chu vawiin khan Mamit GSA Playground ah ropui taka lawm a ni a, khuallian Pu R. Romawia, Minister Land Revenue & Settlement, Higher & Technical etc chuan Hnam puanzar pawtpharin Parade contingents 9  te hnam puanzar chibai buk a chhang let.

Khuallian Pu Romawia chuan India ramin zalenna a hmuh theihna tura sul lo sutu hnam pasaltha Mahatma Gandhi, Pandit Jawaharlal Nehru leh midangte zahna chibai buk a. Mizoram sawrkarin hmasawnna hna a thawh hrang hrang te sawiin Sawrkar Flagship Programme NLUP Mamit District ah pawh tha taka kalpui a ni a, Line Department pariatah mi 11310 tanpuina an dawng tawh a,  Industry hnuaia NLUP Beneficiary 762 te hnenah tanpuina a vaia sem zawh tawh an ni a, tunah hian mi 395 te hnenah 1st Instalmet pek an ni tawh bawk. Sericulture hnuaiah Beneficiaries mi 117 awmin heng zinga 104 te tanpuina pek kim an ni tawh a ni. Agriculture Department hnuaia trade hrang hrang thlangtute zingah 2nd phase tan chhungkaw 678 hnenah Rs 612 lakhs sem niin 3rd & 4th phase atan chhungkaw 588 hnenah Rs 58.80 lakhs sem a ni bawk. Oil Palm bikah phei chuan Mizoramah  Mamit District hian  dinhmun sangber a luah a, Rs 59,84,935 lai tharchhuah a ni tawh a ni. Tunlai thiamna hmanga buhthar hlawk zawknan Agriculture Department chuan RKVY hnuai atangin hma a la mek bawk. Soil & Water Conservation hnuaiah Hmunphiah, Rubber leh Coffee thlangtu mi 103 te tan Rs 136000 sem a ni tawh bawk.

Ei leh bara mipui kan harsat loh nan rualkhai taka buhfai sem a ni a, Ration Card Computerised hna End to End Computerised of Targeted Public Distribution System (TPDS) pawh thawh zawh a ni tawh a. Hrisel leh thianghlim taka eibar tam zawk vawn that a nih theih nan cheng vaibelchhe 9.60 sengin kudam thar 17 sak hna thawh mek a ni a, a thar 27 sakna tur cheng vaibelchhe 32.68 chu NABARD atangin puk a ni a, hemi hmang hian buhfai leh eitur dang Metric ton 8000 zet vawn thatna tur sak belh tura ruahman a ni bawk. Eirawngbawlna Gas indaihlohna avanga harsatna pawhin ziaawm lam a pan mek a, Central Sawrkar thutlukna angin kumin October thla tir atang hian Food Security Act hman tan a ni dawn a, Food Security in a huam chin tur kum 2011 census base in mi 7,06,296 an ni dawn a. He ta tang hian AAY chhungkaw awmsa 26,810 an tel bawk a ni. Food Security in a huam tur hi thingtlangah 81.88% a ni anga, khawpuiah chuan 40.06% a ni ang. Food Security in a huam lo Ration buhfai dawng ve thei lo te tan sawrkar chuan mi pakhatah tan thlakhatah 8kgs tuna kan rate hmanlai anga an dawn ve theihna turin ruahmanna a siam a ni.

Zirna lamah naupang harsatna avanga School an chawlsan mai loh nan naupang 100 awm theihna Residential Hostel pakhat leh naupang 50 awm theihna Girls Hostel enkawl mek a ni a, zirlai bu pawh Mizo Medium leh english medium naupang tan a thlawnin pek an ni bawk. SSA hnuaiah naupang rualbanlo mi 700 enkawl mek an ni a, atul anga training leh tanpuina pek an ni.Mamit College tih changtlunna atan UGC atangin Rs 26.55 lakhs hmuh a ni a, NIELIT Aizawl nen tangkawpin Kumin August ni 3 atang khan College zirlai leh pawnlam mi tan Computer Course tan a ni bawk.

Land Revenue & Settlement Mamit chuan In hmun LSC issued 55 pe chhuakin Huan ram lo ram ah LSC 5 a pe chhuak a, Revenue Tax Rs 239590/-  Non Tax Revenue Rs 331819/- leh Stamp & Registration fee atangin Rs 210502 hmuh a ni. 

Vawiin Independence Day lawmnaah hian Armed Contingent 1 leh school contingent 8 awmin Parade contingent zawng zawng hi 9 an ni a, St.Francis Of Assissi School Pipe Band pakhat a awm bawk. Parade contingent te hi Inspector Lalramtana’n a hova ni. School contingent te zingah hian Presbyterian English School chu pakhatna niin, pahnihna hi Govt Higher Secondary School an ni a, lawmman pathumna hi St. Francis Of Assisi ten an la a ni.

Independence Day lawmna pual hian Mamit District chhung Football leh ValleyBall Tournament buatsaih a ni a, Footballah hian Venghlun FC leh Chhimveng Football Club ten final khelin, Volleyball Final hi  Zodin Volley Ball leh Chhimveng Volley ball ten an khel bawk.

Vawiin India Zalenna champha phak hi Mamit District chhung hmun hrang hrangah pawh lawm a ni a,  W. Phailengah Pu Joseph Lalhlimpuia Parliamentary Secretay in  hmanpuiin Kawrthah ah Pu T. Sangkunga, Chairman Mizoram Youth Commission in a hmanpui bawk a ni.