Vawiin khan Aizawl South Treasury ah Finance Minister Pu Lalsawta chuan Government Payment Gateway (GePG) kaltlanga e-Payment chu Mizorama hman tan turin a hawng.

Finance Minister chuan tunlai thiamna leh hmasawna hmang tangkaia Mizoramah electronic payment (e-payment) system hmanga bill pass a ni ve thei ta leh sawrkar hnathawkte account-ah an hlawh a lut ta mai hi thil lawmawm leh chhinchhiah tlak tak a ni, a ti. Pu Lalsawta chuan e-payment a lo puitlin theihnana thawktute zawng zawng leh  National Informatics Centre (NIC) chungah lawmthu a sawi a, he e-payment hian pawisa chetvel danah awlsamna a siam dawn a,  file chhek khawl tam lutuk pawh thui tak a tiziaawm dawn a ni, a ti a. E-payment hmang hian sawrkar chuan bung thar a kai a, hmasawnna tur tam tak la awm mahse Mizoram hi hmarchhak state zinga e-payment kalpui hmasa ber kan ni ringawt pawh hi thil chhinchhiahtlak tak a ni, Finance Minister chuan a ti bawk.

E-payment hman dan kimchang hetiang hian han tarlang i la :- DDO-in Treasury a Bill a submit dawn chuan a bill submit tur chipchiar kha e-Bill Software-ah thunin text file a rawn pe chhuak anga, chu text file chu pendrive emaw CD in Treasury-ah Bill (hard copy) nena thehluh tur a ni. Text file chu Treasury Office chuan COMPACT-ah lo dahin a bill (hard copy) pawh a dawng bawk ang. Pendrive/CD hmang kher lova text file thehluh a nih theih nan ruahmanna siam a ni a, a thehluhna tur website dat.mizoram.gov.in pawh siam a ni tawh.

Bill chu ATA, TA leh TO ten an pass rualin khawl (system) pawhin a lo pass ve nghal a. TO chuan COMPACT a bill a pass hnu ah COMPACT atang vek chuan USB i-key hmangin e-payment authorization, zip file a pechhuak a. He zip file hian e-payment authorization file leh digital signature file a keng tel a ni. Hemi zawh hian User id leh password hmangin GePG site-ah lut a, dropdown menu a authorization file upload atangin, e-payment authorization file generate tawh sa kha zawn (search) a, chu chu GePG ah upload tur a ni.

Accredited bank chuan GePG atang chuan e-payment authorization file lo download ve lehin TO digital signature a dik ngei tih a endik hnuah pawisa chu sawrkar hnathawkte Bank Account ah a lo dah sak thin dawn a ni.

E-payment hawnna inkhawm hi Finance Commissioner Pi LN Tochhawng chuan a kaihruai a,Aizawl South Treasury Officer Pu Sangkhawma’n technical report pe in Finance Secretary Pu F.Vanlalruata’n lawmthu sawiin hun hnung a khar a ni.