Vawiin khan Finance & Planning Minister Pu Lalsawta chuan Govt.T.Romana College Library building tur lungphum a phum a, he Library building sakna tur hian Mizoram sorkara NEDP hnuaiah cheng vaibelchhe 3.6 pek a ni. He hunah hian Planning Secretary Dr.C.Vanlalramsanga, Govt T.Romana College Principal Dr.Lalrintluanga bakah College faculty leh zirlaite an tel kim hle.
Library lungphum lawmna inkhawm Associate Prof.C.Laldinsanga kaihhruaiah Khuallian Finance & Planning Minister Pu Lalsawta chuan zirna ngaisang tak mi a nih avangin zirna lam tihhmasawn chu a ngaih pawimawh thu a sawi a, vawiin khawvel changkang chak takah hian Mizo thalaite tan pawhin remchanna thar tam tak a inhawng mek a ni, a ti. Kum 1991 atang khan India ramah economic liberalisation hman tan a nih hnuah khawvel ram hamsawn chak berte zinga a tel pha a, tunah chuan khawvel hriatah pawh India hmel a danglam tawh a ni, a ti bawk. Zirlaite chu mahni chakai khawrh an ni ti hriain an zirlaiah thahnemngai taka theihtawp chhuah turin a fuih a, Govt.T.Romana College zirlaite ringawt pawhin theihtawp an chhuah chuan Mizo ram leh hnam hmel an tidanglam thei a ni, a ti.
Planning Secretary Dr.C.Vanlalramsanga pawhin thusawiin Mizoram sorkarin programme thar NEDP a kalpui tan khan he programme thar zirchianna nei hmasa ber College an nih avangin thla leh September ni 6-a NEDP inkhawmpui neih turah pawh a bik takin Govt.T.Romana College te chu tel tura sawm an nih thu a sawi a. Govt.T.Romana College Pricipal leh zirtirtute fakin Planning Secretary chuan College hmasawnna tur atan an ngaihtuahna leh tha an seng takzet a, sorkar hennah pawh an College hmasawnna tur an thlen taima hle a ni tih sawiin Dr.C.Vanlalramsanga chuan an zirlaite pawhin an hotute thahnemngaihna tawmpui a, an lehkha zirna lamah theihtawp chhuah turin a fuih.
Govt.T.Romana College hi kum 1992 khan din tan a ni a. NAAC Accreditation Grade-'B' neiin kum 2018 ah hian zirlai 1730 an awm mek a, zirtirtu 38 leh Office Staff 18 an awm mek bawk.Vawiina Library building sak tur lungphum phum tak bakah hian College tuizem lian sakna tur sorkarin cheng nuai 16 a pe tawh bawk a ni.
