“Information is Power” : Dr. Arun T
Vawiin khan I&PR Conference Hall, Kolasib Project veng ah Information & Public Relations Department huaihawtin Mizoram Sawrkar hnuaia Department hrang hrang ten an hmalakna tlangpui leh an hnathawh kalphung te sawi zauna hun ‘Public Information Campaign’ neih a ni.
He hunah hian Kolasib khawpui chhunga Department lian zual a bikin Developmental Works khawih ho Department 16 in an hnathawh kalphung bakah kum 2017-18 chhunga an hmalakna te leh kum 2018-19 chhunga hmachhawp an neih te chu sawi zauna hun an hmang a, mipui te aiawh a sawm khawtlang hruaitute leh Media (MJA) atang te in zawhna siam ani a, heng zawhna te hi a changtu Department ten an chhang nghal a, chipchiar taka chhan ngai zawhna an nei anih pawhin an Office ah Office hun chhungin inthlahrung loa zawhfiah thei ani tih Department hrang hrang hotute chuan an tarlang a ni.
He huna khuallian Kolasib Bawrhsap Dr.Arun T, IAS chuan Democracy rama langtlang (Transparency) Sawrkar a pawimawh zia sawiin Sawrkar kalphung bakah Department hrang hrangte hnathawh leh hmalakna te hriatpui/hriat chu mipuite chanvo ani tiin RTI hmang pawhin Sawrkar Department te hmalakna an zawt thiang a, inthlang Ram a (Democracy) langtlang taka thil kalpui a mipuite hrilhhriat zel chu mipuite tih chakna (empowerment of the people) a tana hmanraw pawimawh ber pakhat a ni tiin Dan leh Hrai, kalphung leh hmalakna hrang hrang te inzir a, hriat zau chu mihring ti chaktu (Information is power) leh nunphung kaihruaitu pawimawh tak ani a ti bawk.
He Campaign hi Pu David L Thangliana, MIS, Director Information & Public Relations Department in a kaihruai a, Kolasib khawpui chhunga Department hrang hrang hotute bakah Sub Hqrs YMA, MHIP bakah MJA General Hqrs atangin leh Kolasib District MJA member te an tel a ni.
