Vawiin khan Lawngtlai District AH & Veterinary Officer (DVO) Quarters sak thar chu AH & Vety Minister Pu C. Ngunlianchunga'n a hawng.


Pu C. Ngunlianchunga chuan Lawngtlaia DVO Quarters sak a ni leh hawn theiha peih a ni ta chu lawmawm a tih thu sawiin, hma sawnna chhinchhiah tlak tak a ni, a ti a. Tun hnaia a enkawl department AH & Vety hnuaia hma lakna leh hma sawnna hrang hrang tar langin, Vety department chu mipuite tan innghahna tlak department-ah din chhoh a ni, a ti a. Ramin hma a sawn nan mipuite'n mawh phurhna lian tak kan nei a, dik lo taka sum hai luh theih chu intlansiakna tur ni tawh lovin, thil tha tih lam intihhmuh a hun tawh zawk tih sawiin, mahni zawn theuhvah ram tana theih tawpa thawh chu khua leh tuite tih tur a ni, a ti.

Khual zahawm LADC CEM Pu T. Zakunga pawhin Lawngtlaiah DVO quarters thar hawn a ni chu District tan hma sawnna rahbi pakhat a ni tiin, sawrkarin LADC huam chhunga hna tha tak tak a thawk thin chu lawmawm a tih thu a sawi bawk.

He hun hi Lawngtlai Bawrhsap Pu N. Chakhai MCS chuan a kaihruai a. Presbyterian pastor Rev. R. Lalfakawma'n hunserh hmangin, quarters thar chu Pathian hnenah a hlan a. Lawngtlai District AH & Vety Officer Dr B. Zonghinga'n technical report a pe a. CVO Dr Lalrintluanga'n lawm thu sawiin, hun khar a ni a. Tlaiah quarters thar lawmna chawhlui kil ho nghal a ni.

Vawiina DVO quarters thar hawnnaah hian LADC-a member-te, state leh LADC official-te leh mi pawimawh dang eng emaw zat an kal khawm a ni.

Lawngtlai DVO quarters thar hi RKVY flexi fund hnuaia value addition centre sum hmanga sak a ni a. A sak hna hi AH & Vety Department-in thawkin, Rs nuai 33.12 sanction a ni a. Type-IV quarters niin, a dung fit 45 leh a vang fit 30-a zau a ni a. A hmun awh zau zawng hi square fit 1564 a ni.

Attachment

  • Loading attachment...