Vawiin khan Finance Minister Pu Lalsawta chu Directorate of Science & Technology (S&T) Conference Room-ah Hazard Risk and Vulnerability Analysis of Aizawl, Mamit and Serchhip thlangzarhna neiin, khuallian a ni. Pu A.D. Kharshing, Extension Officer (Seismologist), S&T, NEC chu khual zahawm a ni.

Minister Pu Lalsawta chuan Mizoram hi chhiatrupna thlen theihna ram anih avangin, invenna leh inpuahchahna tha a pawimawh tak zet a ni, a ti a. Hetiang kawnga Mizoram Remote Sensing Application Centre (MIRSAC) te’n hma an la hi fakawm a tiin, sawrkar chawlhni-ah pawh a chhuna zana an thawh thin avangin Scientific Officer te leh hnathawktu dangte hnenah lawmthu a sawi a ni. Vawiin ni a Analysis Data te hi dah that mai ringawt tawk loin, a tak taka zira buaipui zui ngai a ni, a ti a. Chhiatrupna lo thleng ta se, inhliamte enkawlna leh hmun him tha zawk buatsaih hi a ngai tak zet a, hemi chungchangah hian ngaihtuahna sen mek a ni, a ti bawk a ni. Sawrkar lam chauh inbuatsaihna nilo, mimal inbuatsaihna, in chhungah leh mahni awmna hmuna emergency aid lo neih lawkte hi a fin thlak em em a ni, tiin a sawi a. Inbuatsaihna tha neitur chuan Department pakhat chauh ni lovin Department hrang hrangte nena thawh ho leh inrawn tawn a pawimawh em em a ni, tiin a sawi a ni.

Khual zahawm, Pu A.D. Kharsing pawhin thusawiin hun hma lamah NEC hnuaiah MIRSAC hian hmasawnna hrang hrang an thawh thin thu leh belhchian tlak taka thawk thin an nih thu a sawi a. Tun dinhmunah hian 3D Terrain Mapping te, HRV Project leh adangte kalpui mek a nih thu a sawi bawk a ni.

Pu Z.D Laltanpuia, Senior Scientist, MIRSAC chuan Aizawl, Mamit leh Serchhip District a hmalakna tlangpui presentation a nei a. Khuarel chhiatna lakah Mizoram panna lai (vulnerability) leh chhiatna lo thleng thei (risk) chi hrang hrang GIS Data Based System hmanga siam a tarlang a ni. Hemi data analysis atan hian Quickbird Satellite Imaging, IRS Cartosat Stereo Data leh hmanrua dangte hman a ni. Data Analysis atan hian Satellite Image chauh ring loin, a hmunah kala survey neih vek a ni bawk a ni.

He hun hi Dr. R.K. Lallianthanga, Chief Scientific Officer leh Member Secretary, MIRSAC chuan kaihhruaiin, District Office atanga aiawh leh Department hrang hrang aiawh te’n an telpui a ni.

Hazard Risks and Vulnerability Analysis hi District dangah pawh la neih zel tura hmalak mek niin, North East Council atanga fund hmuh a ni.