Finance Minister Pu Lalsawta chuan vawiin khan Mizoram Cooperative Apex Bank (MCAB) Limited inkhawmpui vawi 21-na chu Vanapa Hall-ah a hmanpui. General Conference hi MCAB Ltd. Chairman Pi T.Lalmuanpuii chuan kaihruaiin, Conference palai te inlawmna thuchah a sawi a, Aizawl Bishop, Bishop Most Rev. Stephen Rotluanga, CSC chuan hunserh a hmang a ni.

Finance Minister Pu Lalsawta chuan Mizo Cooperative Apex Bank Ltd. chu Mizo bank a nih thu sawiin bank dang ten an sum tling khawm (reserve) phai lamah peipun tura an thawn liam laiin Apex Bank chuan mipui atanga deposit an hmuh te chu Mizoram ah chelh dingin, mi tam tak hnenah hnathawhna leh eizawnna kawnga bul an tan theihna turin heng sum te hi an puk tir thin a ni, a ti. Bank hian mipui tan rawng an bawl em tih leh mipuiin an tangkaipui em tih chu engemaw chen an Credit Deposit Ratio (DC Ratio) hian a hrilh theih thusawiin Apex Bank Credit Deposit Ratio (CD Ratio) za zelah 67.13 ni leh Bank zingah a sang lawr lak hian mipuiin Apex Bank hi an ring tawka, Bank pawhin mipui an ring tawk hle a ni a tih a ti chiang a ni, a ti bawk.

Rinawmna hi Bank leh a hnuaia thawkte tan a pawimawh ber a, mipuiin an sum bank ah an dah chu a him a ni ti a an ngaih a that chuan bank chu a thang zel thei a ni, a ti. Khawvela ram ropui ber nia sawi fo USA pawh hi an changkanna bul ber chu an ram din tirh atanga bank an ngaipawimawh vang ni a a rin thu a sawi. Sawrkar chuan Apex bank ah hian thuneihna a tlem thei ang ber neih a duh thusawiin shareholder te ngaihdan zalen tak leh rinawm taka an kalpui chuan an hmui a ngil choh zel a rin thu a sawi bawk.

MCAB Ltd CEO Pu Ropiangliana chuan inkhawmpui ah hian kum 2013 – 2014 Annual Report tlangpui a tarlang a, Pu Jack L. Darkim, Registar of Co-operative Societies leh Secretary, Co-operation Department ni bawk pawhin thu a sawi. Pu Laldingliana Ralte, Vice Chairman, MCAB Ltd. chuan lawmthu sawiin hun a khar a. Chawhnu lamah palai rorelna inkhawm hmangin Report sawihona an nei. Kum 2011 -12 leh 2012-13 khan sum hloh (loss) in Bank hi a kal a mahse kum 2013-2014 chuan sum hlawkna(profit) cheng nuai 291.98 an nei a ni. March ni 20, 2014 thleng khan Society 1023 chuan share capital cheng nuai 138.54 hu man neiin chu chu za zelah 76.18 a ni a, Sawrkar chuan share capital cheng nuai 43.33 neiin chu za zelah 23.82 a ni.

Mizoram Cooperative Bank Ltd, hi July ni 31, 1982 khan din niin Mizoram pumah Branch 13 an nei mek a, thawktu 165 an awm mek ani. Board of Director ah hian mi 11 awmin chung zingah mi 6 te chu thlan a ni a, 3 chu bank tana tangkai thiamna nei bik professional an ni a, anni bakah hian RCS chu Sawrkar aiawh leh CEO chu Board of Directors a member dangte an ni.