Vawiin chawhnu khan Planning Minister Pu Lalsawta chuan Mizoram remote sensing application Centre(MIRSAC), Chaltlang ami chu a tlawh a.He hunah hian MIRSAC in a buatsaih Geo-referenced Base Map of Lunglei Town chu UD&PA Department hnenah a hlan nghal. Geo-Referenced Base Map of Lunglei town hi UD&PA in Rajiv Awas Yojana(RAY) kaltlanga Lunglei khaw chhunga mi harsa zual te chenna hmun tih hmasawn hna a thawh tur atan a hman tangkai a ni dawn a ni.

Minister hi MIRSAC Project Director& Member Secretary Dr.R.K. Lallianthanga'n lo dawngsawng in MIRSAC hmalakna kawng hrang hrang te a lo hrilhfiah a. An hmalakna thenkhat zingah NEC hnuaia thawh mek Mizoram Infrastructure Information & Monitoring System(MIIMS), Department of Space hnuaia National Remote Sensing leh North eastern Space Application centre te nena an thawhhona- space Based Information Support for decentralised Planning(SIS-DP) leh Groundwater quality mapping te chu a langsar deuh te an ni.

Planning Minister Pu Lalsawta chuan hnam changkang zawk zinga mithiamte chauh tih theih anga kan ngaih thin te kha Mizopa thluak hian a lo thiam ve tawh reng mai hi tunlai khawvel hmasawnna kawng hrang hrang ah Mizote kan hnufual bik loh zia tilangtu a ni a ti a. MIRSAC hian mipui nawlpui hriat pui em em lovin rim takin hna an thawka an kutchhuakte hi thiamna sang tak hmanga duan a nih avangin a hmantlak a. A dawrtu department hrang hrang te pawhin tangkai taka an hman zel a beisei thu a sawi a. Hmanraw tha tak leh changkang tak tak te hi neih theih a that tluk zetin hman tangkai erawh a pawimawh thung a ni a ti. Hmasawnna ruhrel duang turin map, ram hmelhmang, lei chhung leh pawn lang thlenga chanchin kimchang taka tarlanna a pawimawh tawh thu a sawi a. MIRSAC data leh map te chu project hrang hrang siam thin department ten tun aia nasa zawka hmang thin tur leh hmanna chang hre turin a chah a ni.