Parliamentary Secretary Pu Joseph Lalhimpuia hovin vawiin chawhnu dar 3:30 khan ama office chamber ah School Education, SCERT, SSA, RMSA leh Planning Department aiawh official kalkhawm ten Clean Mizoram Programme chungchang an sawiho a, zirlai te hnena faina leh thianghlimna inzirtir dan tur te an rel.
Parliamentary Secretary Pu Joseph Lalhimpuia chuan Education Department-in zirlaite hnena lehkha zirtira thiamna pe tura hma an lak mai bakah Zoram mipuite hnena faina leh thianghlimna zirtir uar deuh deuh tura zirlaite hmanga hma nasa taka lak theih a nih dan te a tarlang a, chutiang zawnga hmalakna chuan reilo te ah Mizoram hmel a tihdanglam theih ngei a beisei thu a sawifiah bawk. Naupang leh tleirawl ten Mizo khawtlang nunah engmah mawhphurhna an neih tawh loh chu ngaihmawhawm tiin Pu Joseph Lalhimpuia chuan tleirawl rual te chu ram mi leh a neitu an nih hriattir a, an chenna leh khawtlang hmunhma vawn thianghlim kawngah mawhphurtu an nih hrilhhriat uar a pawimawh thu te sawiin thiam taka chawhphur a tul thu te a sawi lang bawk.
Vawiin meeting ah hian faina leh thianghlimna kawnga ram puma hma kan sawn theih nana hmalak dan tur te, sum mamawh ruahman dan tur te, State leh District level-a mawhphurtu inruata chak taka bawhzui chhoh dan tur te zau takin an sawiho bawk a ni.
