Vawiin chawhma dar 11 khan Mizoram Information Service Association (MISA)-te chuan Annual Conference 2017 I&PR Conference Hall-ah an hmang a. Finance Minister Pu Lalsawta leh I&PR Secretary Pu Biaktluanga IAS te’n an hmanpui. 

Pu Lalsawta chuan I&PR chu department pawimawh tak, sawrkar hmalakna leh ruahmanna hrang hrang mipuite hrilhhretu, sawrkar awm chhunga department awm reng tur, thu rintlak leh belhchiandawl tichhuaktu an ni, a ti.  MIS Officer-te chu a eng zawnga thil thlir thin tur leh Department danga officer-te nen pawh tha taka thawkho zel turin a fuih a. Mizoram sawrkar hmalakna thar pawimawh tak New Economic Development Policy (NEDP) hlawhtlin theih nan thawhpuiah sawmin he hmalaknaah hian I&PR Department-in mawhphurhna pawimawh tak a nei chho zel dawn a ni, a ti. 

Conference hmanpuitu dang I&PR Secretary Pu Biaktluanga IAS chuan mipui thlan sawrkar (democracy) ramah chuan sawrkar hmalakna leh kalphung hriat hi mipuite chanvo a ni a, Information Service Officer-te chu sawrkar thupuangtu an nih angin hemi kawngah hian mawhphurhna sang tak an nei tiin sawrkar leh mipui inkara inlaichinna tha siam theitu an ni, a  ti bawk. 

I&PR Director  Pi Lalnithangi, Mizoram Information Service Association (MISA) Patron ni bawk chuan sawrkar policy leh scheme te chu mipui tawiawmna telloin a hlawhtling thei lova, chuvangin mipui hriattir leh zirtir kawngah MIS officer-ten mawhphurhna sang tak an nei, a ti a. I&PR Department chu department lian ni lo mahse Mizoram kil tin atangin print leh electronic media kaltlangin sawrkar hmalakna pawimawh chak takin a puangzar reng a ni, a ti. 

MISA Annual Conference 2017 hawnna programme hi MISA Vice President Pu David L. Thangliana’n a kaihruai a, Pi P.B. Lianthangpuii MISA General Secretary-in I&PR Department hmalakna leh hmachhawpte report a pe bawk a. Pu F. Lalfakzuaka, President MISA chuan lawmthu sawiin hun a khar a ni. Chawhnu lamah ‘Workshop on Public Relations Profession’ hun hman a ni a, Pu C. Lalrosanga, IBPS, Director General Doordarshan (Retd)-in ‘Role of Government Public Relations Practitioners’ tih thupui hmangin thu a sawi a, Pu Zothankunga MIS (Retd)-in ‘Sawrkar Press Release ziak dan’ tih thupui hmangin thu a sawi bawk a ni.