"Sawrkar in mipui mamawhna avangin public service lirthei permit-te pekchhuah a ni a, chutih rual chuan permit neitute hian lirthei an lei rual hian mipui leh sawrkarah mawhphurhna sang tak an lei tel a ni tih an hriat a pawimawh," tiin Parliamentary Secretary for Finance, Planning and Programme Implementation, etc. Pu K.S. Thanga chuan vawiina Aizawl City Bus Owners' Association (ACBOA) Conference, Synod Conference Hall-a a hmanpui naah a sawi.

Parliamentary Secretary chuan lirthei neitu leh khalhtute, passenger-te leh bungraw phurtu Public Service kan tihte hian mamawhna avang leh pawisa an neih vang ringawt a lirthei lei an nilo tih an hriat hi a pawimawh a ni tiin, permit in mawhphurhna a ken tel te pawh an hriat tul a tih thu a sawi a. Dan zawm that loh avangin mipuiin harsatna an tawk fova, hetiang thilah hian permit cancel thlenga dan zawm thalo te chungthu ngaihtuah a nih theih thu sawiin, Pu K.S. Thanga chuan lirthei neitute pawhin driver lak thlengin fimkhur turin ACBOA member-te chu a chah a ni.

Lirthei khalhtu ten dan an zawm loh hian driver-te ai mahin a neitute mawhphurhna a san zawk thu leh sawrkarin Iirthei khalh dan tur kalphung fel tak a neih chu zawm ngei a ngaih thu Parliamentary Pu K.S. Thanga chuan sawi telin, mipui rawngbawlna rilru ah pu reng chungin thawh rualpui thiam turin kalkhawmte chu a ngen a ni.