Vawiin chawhnu dar 1 khan I&PR Auditorium-ah Mizoram Information Service Association (MISA) chuan kum tina an hman thin, MISA Conference 2018 an hmang a. Minister of Finance, Planning etc Pu Lalsawta chu Khuallian a ni.

Khuallian Pu Lalsawta chuan thu thar leh thil pawimawh dang hrilhdarhnaah mipui ten a nihna ang takin an hriat a pawimawh a ni tiin thu diklo vangin tullo ah buaina a chhuak thei a ni, a ti a. Sawrkar hmalakna puandarh kawngah thahnemngai taka thawk turin kalkhawmte chu a chah a. Mizoram chu state naupang tak kan ni a, sawrkar hnathawk hlawh leh hamthatna turah keini state leh state upa tak tak nena inkhaikhin thlap thlap a theihlohna kawng tam tak a awm a ni tiin hetichung hian sawrkar chuan hlawh thar chungchang pawh cabinet meeting-a telh a nih theih nan hma a la mek a ni, a ti a. Multi Facility Centre tur Lianchhiari Run chuan tangkaina tam tak a nei dawn a ni tiin Aizawl khawpui cheimawitu tur a ni dawn bawk a ni, a ti a. MISA kal zelna turah duhsakna a hlan nghal bawk a ni.

MISA President Pu David L Thangliana chuan MIS-te chu sawrkar hmalakna leh hnathawhte puangzar tu ber an nih thu sawiin MJA nena thawhhona tha tak an la nei zel chu a lawmawm thu a sawi a. I&PR Department ten NEDP hnuaia an hmalakna hrang hrang sawiin Lianchhiari Run Multi Facility Centre sak tur chungchang leh Ailawng khuaa Film City siamna tura I&PR hmalaknate a tarlang bawk a ni.

MISA Annual Conference hi MISA Vice President Pu C. Lalnunkima chuan a kaihruai a. MISA General Secretary Pu Malsawmsanga atangin report ngaihthlak a ni a. I&PR Joint Director Pi Lallianpuii chuan lawmthu sawina in hun a khar a ni. Programme hi MISA Conference 2018 Business Session-in a zui nghal a ni.