Vawiin khan Mizoram Economic Association (MEA) chuan Aijal Club Reception Hall-ah Conference an hmang a, Finance Minister Pu Lalsawta chu khuallian niin he hun hi a hmanpui.

Pu Lalsawta chuan sawrkar laipuiin state te hnena sum a pek chhuah dan inthlakthleng ta chungchang sawiin Share of Taxes leh Gap Grant-ah state sum hmuh te a infun khawm a, Planning Commission nuaibo niin NITI Ayog in a luahlan ta a, Centrally Sponosored Scheme chu tum hma angin tam lo mahse kan la dawng chhunzawm zel a ni, a ti. Mizoram chuan ‘state own resource’ a neih tlem avangin sawrkar laipui atanga sum hmuh ang ang mamawhna zawn takah tangkaina indawt dan fel taka ngaihtuaha hman thiam a ngai a ni, a ti a. Sawrkar hmalakna thar New Economic Development Policy hi sawrkar laipui leh state sawrkar sum chetvel dana inthlakthlengna tam tak thleng mek mila siam a nih thu a sawi bawk. Finance Minister chuan sum indaihlohna avanga Mizoram state sawrkarin RBI (Ways and Means Advances) hmanga sum a pung awma a puk thin pawh kum kalta June ni 30 atang khan puk a ngai ta lova, K-deposit-ah cheng vaibelchhe 1,400 vel zet awm thin pawh 500 hnuaiah a tla thla tawh a ni, a ti a. Sum hmuh dan lo danglam chhoh tak china Mizoram sawrkarin a tum ber chu Recurring Expenditure ngai chi tih tlem te, hmasawnna ruhrel din zawnga sum hman tam, employment siam tam thei zawnga sawrkar kalphung her rem leh kuthnathawk, loneitu leh entrepreneur ten thar chhuah leh thawh chhuah an neihna kawng zawnpui te a ni, tih sawiin State GSDP tihsan a, zofate retheihna khur atanga khai chhuaha, State hausa dinhmuna hruai luh hi sawrkar tum lian ber a ni, Minister chuan a ti.

MEA conference hi nilenga neih niin chawhmaah an President Prof. Vanlalchhawna’n inkhawm a kaihruai a. Chawhnuah Vice President Dr SR Zonunthara’n kaihruaiin, khuallian hian Mizoram Economic Review lehkhabu buatsaih chu a tlangzarh a. Dr James LT Thanga, MZU chuan Mizoram New Economic Development Policy chungchangah special lecture a pe a. Zawhna leh chhanna hun hman a ni bawk.