Vawiin chawhnu khan UD&PA Minister Pu Zodintluanga hovin High Level Monitoring & Coordination Committee for Swachh Survekshan 2017 chuan lndia ram khawpui fai thlanna survey, Swachh Survekshan 2017 atana inpuahchahna leh ruahmanna an thlirho. He hunah hian Parliamentary Secretary Pu Hmingdailova Khiangte chu a tel bawk a ni.
Minister chuan Sorkar laipuia Ministry of Urban Development hnuaia India ram khawpui hrang hrang faina kawnga enfiahna Swachh Survekshan 2017-ah dinhmun sang zawkah Aizawl khawpui chu a awm theih nan High Level Monitoring & Coordination Committee chu din anih thu a sawi a. India ram khawpui tam tak nen khaikhin chuan Aizawl chu a fai hle a ni tiin, Line Department zawng zawng te, AMC, SIPMIU, Local Council, tlawmngai pawl, thuthar lakhawmtute leh Aizawl mipui zawng zawng kan tanrual a ngaih thu a tarlang a. UD&PA Minister chuan faina leh thianghlimna kawngah hma kan sawn chhoh zel rualin, hmabak tam tak a la awm thu sawiin, chumi atana ruahmanna siam pakhat, bawlhhlawh a paihna tur lova paihte hrem theihna Dan (anti-littering law) chu hman mai theih tura peihfel a nih tawh thu a tarlang a. Faina kawngah inhrilhriatna (awareness) nasa zawka neih a tul thu a sawi bawk.
Vawiin meeting-ah hian UD&PA Secretary Dr C. Vanlalramsanga chuan Swachh Survekshan 2017 chungchang leh chumi atana inpuahchahna Swachh Aizawl City Plan ruahmanna chu powerpoint hmangin a sawifiah a. Department hrang hrang, AMC, Local Councils, YMA leh tlawmgngaipawl dang ten hmalakna an neih theih dan tur leh hmalakna tur a tarlang bawk. Swachh Survekshan 2016 neih takah khan khawpui 73 enfiah zingah Aizawl chu 41-na a ni a. 2017-ah chuan Aizawl khawpui dinhmun thlirin rank sang tak ni thei tura ngaih anih thu a tarlang bawk.
Vawiin meeting-ah hian Swachh Aizawl City Plan, 2017 leh Action Plan-2017 chu en ho niin, committee chuan a pawm a. Tlangzarh hun tur leh Aizawl khawpui chu Open Defecation Free (ODF)-a puan theih hun tur te rel a ni bawk. Swachh Survekshan 2017 hnuaiah hian tehna hrang hrang hmangin India rama AMRUT (Atal Mission for Rejuvenation and Urban Transformation) city 500 te faina lama an dinhmun teh an ni dawn a. Aizawl khawpui pawh AMRUT city a nih angin he intihsiaknaah hian a tel dawn a ni. Swachh Survekshan 2017 hi August ni 6, 2016 khan tlangzarh a ni a. Khawpui faina hi thuang thum a endik tur niin, chungte chu - (i) Municipal Documentation (Self-Assessment by AMC) - 45% (900 marks); (ii) Direct Observation (by Quality Council of India) - 25% (500 marks); leh (iii) Citizen's Feedback (phone/social media leh Swachhata App kaltlangin) - 30% (600 marks) an ni a. Quality Council of India hian January ni 4 atanga February ni 4, 2017 chhungin India state leh UT zawng zawng tlahchhuakin Direct Observation an ti ang a. Chumi atana inpuahchahna te chu vawiin meeting hian a thlir tel bawk a ni.
Swachh Survekshan intihsiakna a category hrang hrangte chu: (i) Municipal Solid Waste - Door to Door Collection, Sweeping and Transportation - 800 marks; (ii) Open Defecation Free/ Toilets - 600 marks; (iii) Municipal Solid Waste - Processing and Disposal — 400 marks; (iv) Information, Education and Behavior Change Communication - 100 marks; (v) Capacity Building (SBM eLearning Portal) - 100 marks, te niin, a vaiin mark 2000 a pu dawn a ni.
