"Mizoram Youth Summit 2017" chu vawiin atang khan Pachhunga University College Seminar Hall-ah neih tan a ni a. He Summit hi Finance Minister Pu Lalsawta chuang hawngin, a ni ho hian kalkhawmte nen interaction neih nghal a ni. Kumin Youth Summit thupui chu 'Shaping the Future' tih niin, ni hnih chhung a awh dawn a ni.

Minister Pu Lalsawta chuan Mizoramin kawng tam takah hma kan sawn chho mek zelin lawmawm hle mahse, ram deh chhuah tihpunna leh eizawnna ngelnghet siamna kawngah erawh chuan pi leh pute hun laia kan kalphung, nung tawk tawk (subsistence level) nihna bak hi kan la pel hleih theih loh avangin hmalakna tur tam  tak kan la nei a ni, a ti a. Zirna kawnga State dangte ai maha Mizoram chungchuan thinna, Human Resource Development (Education) chuan chhungkaw tam chu Sorkar hnathawkin eizawnna ngelnghet neiin a siam thu a sawiin, "Mahse, he eizawnna ngelnghet tuihna hi khawvel ram dang ang bawkin a kangchat chho tial tial ta mek a. Thiam leh taima filawr bik tlem tan erawh kawng a la inhawng zel a ni," a ti. Ram dinchhuahna chu a ram leilung leh boruakah a innghat lova, a mipuiah a innghat zawk thu sawiin Minister chuan Mizoram aia ram chhe zawk leh remchanna nei tlem zawk ram tam tak an lo dinchhuah dan te a tarlang a. Mizoram chu sik leh sa chungchangah te, ram leilung chungchangah te chuan khawvelah han awh ngawih ngawih bik tur nei lo khawpa malsawmna dawng a nih thu sawiin, Mizo thalaiten tih tur pakhat an nei chu "kan ram hi ram nuam leh ram hausaah i siam ang u"  tih a ni, a ti a.

Minister chuan thalaite leh mihausate an harh chhuak thar a, thingtlang lama chengten buh leh bal, thei leh thlai, ranvulh leh kawng dangah tun aia tam daih zawk an lo dehchhuah a, chu hmanga Company-te auh luh a, chutianga Mizoram chu "Subsistence Level" atanga talchhuak a "Market Economy" dinhmuna zuang lut tura fehchhuah chu thalaite'n tum se a duh thu a sawi a. An mamawh intawm (Common Infrastructures) buatsaih chu Sorkar tum tur a nih thu a sawi bawk. Minister chuan hma la turin sum lungkham hmasak ber ai chuan 'idea', ngaihtuahna tha neih a pawimawh hmasak thu sawiin, awlsam taka sum lakluh duhna in taimakna a hawhbo thin thu a sawi a. Minister hian taimakna chu thil sawi mawi harsa, mahse mimal leh ram hmasawnna atan pawimawh si a nih thu sawiin, thalai kalkhawmte pawh chutiang tur chuan an rilru siam turin a chah a ni.

Mizoram Youth Summit hi Hillsgate Weekly in a buatsaih niin, Mizoram Cooperative Apex Bank Ltd. leh Mizoram Rural Bank nen an tangkawp a ni. Summit ni hmasa ber hian "Thalaite leh Politics", "Human Resource Development" tih leh "Act East Policy" tih thupui hmanga mithiam sawm bikte hnen atangin thusawi ngaihthlak leh sawihona neih a ni a. Summit hawnna inkhawm hi Pu C. Lalhriatpuia, Hillsgate Editor chuan a kaihruaiin a; Zirlaite bakah tlawmngai pawlte leh political party aiawh te he hunah hian an tel a ni.