Vawiin chawhma khan RMSA Mission Lunglei District hmalakna in Government High School Lunglei kawtzawlah Lunglei khawpui chhunga high school zirlaite intihhlimna leh inkawmhona programme Winter Fest – 2017 buatsaih a ni a. Social Welfare Minister Pu PC Lalthanliana chuan khuallian niin a hmanpui. He hunah hian Lunglei khawpui chhunga Government leh Government Aided School sawmpali (14) atangin high school zirlai leh zirtirtute thahnem tak an kalkhawm.

Pu PC Lalthanliana chuan zirlaite hmakhua ngaia an tana programme tha tak leh hlimawm tak buatsaih sak tu RMSA Mission Lunglei District leh zirtirtute chungah lawmthu a sawi a. Zirlai kalkhawmte chu ram leh hnam tana mi pawimawh, nakin lawka kan ram leh khawtlang hruaitu tur an ni tih hre thar leh turin a chah a. Kan ram leh hnam humhalhna atana tha ber chu thiamna hman tlak a ni tiin Social Welfare Minister chuan  ram leh khawtlang tana mi chhawr tlak ni tura tan la turin zirlaite  a fuih a. Mizoram chu ruihhlo hmanga run in a awm mek a, kan thalai tam tak nun a ti chhe mek a  ni tiin zirlai kalkhawm zawng zawngte chu Drugs/ruihhlo laka fihlim turin an thinlung hlan thar turin a chah a. Zirna leh eizawnna kawngah thahnem ngai tak leh rilru nei taka inpuahchah chho turin zirlaite a chah bawk a ni.

He huna thu sawitu dang Lunglei SP Pu Lalthafamkima Jongte, MPS chuan zirlaite chu an nun kawnga hun pawimawh tak an zawh chhoh mek avangin an nun uluk tur leh humsual vawikhat dai a pawi zia hre nawn leh fo turin a chah a. Zirlaite chu  Drugs/ruihhlo laka fihlim tur leh thahnemngai taka zir turin a fuih bawk.

Vawiin Winter Fest – 2017 hawnna programme hi Pu Lalramthianghlima, DEO leh RMSA DPC ni bawk in a kaihruai a, Pu Joseph L. Chhakchhuak, Coordinator, RMSA Mission-in Report a pe a. Pu PC Lallawmzuala, Dy DPC RMSA Mission chuan  lawmthu sawiin  chawhma hun a khar a ni.

Chawhnu lamah solo, speech, skit, Cos-play leh Dance item te neiin inthihhlimna hun an hmang chhunzawm dawn a ni.