Vawiin khan Department of Mizo, Mizoram University, All India Tribal Literary Forum (AITLF) leh Ramnika Foundation Delhi tangkawpa  buatsaih National Seminar on Mizo Prose Writings ni hnih awh tur chu Finance Minister Pu Lalsawta’n Synod Conference Centre-ah a hmanpui.

Finance Minister Pu Lalsawta chuan thu sawiin National Seminar on Mizo Prose Writings buatsaih  a ni chu lawmawm a tih thu leh Mizo thu leh hla-a mi ngaihsanawm leh sulhnu pawimawh tak tak hnutchhiahtu te  chawimawina hun hman a ni chu  lawmawm a tih thu a sawi a. Thangtharten ‘ka peih lo’ tih kan awlsam lutuk chuan Mizo work culture a thalo zawnga a nghawng thu sawiin hlawhtling tur chuan kan thiltih na apiangah taimak leh teirei peih a tulzia a sawi  bawk a. Pu Lalsawta chuan Mizo zirlai leh researchers kalkhawm te hnenah  vawiina  chawimawi te anga Mizo thu leh hla tihausa tu leh ti hmasawn tu nih tum theuh turin a chah bawk a ni. 

He hunah hian Finance Minister Pu Lalsawta chuan lehkhabu pahnih ‘History of Mizo Literature Bu Thar’ leh ‘ZA-THUM’ Prof. Laltluangliana Khiangte ziah a tlangzarh nghal a ni.

National Seminar on Mizo Prose Writings hawnna inkhawm hi Prof. Laltluangliana Khiangte Head of Mizo Department MZU in a kaihruai a. Prof. Laltluangliana Khiangte hian kalkhawmte lawmna thu sawiin keynote address a pe nghal bawk a. He hunah hian Rev. Dr. Zairema, Pu C. Rokhuma leh Pu R. Zuala te  kum za tlin lawmna leh Mizo literature-a an sulhnu hriatrengnan an chhungte hnenah chawimawina hlan a ni.

National Seminar on Mizo Prose Writings hi chawhnu lamah neih chhunzawm niin Rev Dr. Zairema, Pu C. Rokhuma leh Pu R. Zuala te chanchin leh thuziak te zirhona hun hman a ni a. Naktuk nilengin Pachhunga University College Seminar Hall-ah National Seminar on Mizo Prose Writings hi hman chhunzawm leh a ni ang.