India sorkarin kum 2018 ral hma a ram pum a naupang kum hnih hnuailam leh nu naupai 90% aia tam hnenah hri danna (vaccination) pek hman an nih theih nana ngawrh lehzual a hmalakna, "Intensified Mission Indradhanush (IMI)" chungchang inzirtirna chu September ni 23, 2017 (Inrinni) khan Guwahati-ah India hmarchhak state pasarih (Arunachal Pradesh, Manipur, Meghalaya, Mizoram, Nagaland, Tripura leh Sikkim) a thuthar thehdarhtute tan "Media Sensitization Workshop on IMI" buatsaih a ni. He workshop hi Regional Resource Centre for NE States (RCC- NE)leh UNICEF tangkawpin an buatsaih niin, October ni 7-a Intensified Mission Indradhanush tlangzarh tur atan lo inpuahchah lawkna pakhat a ni.
RCC NE Director Dr. Lamin Tada chuan workshop chhimtute lawmna thu leh IMI target tihlawhtling tur chuan media lam a thawk te pawimawhzia sawiin, state hrang hranga hri danna pek dan chungchang zirchianna neih a nih hnu a langchiang chu inhrilhhriatna tam tawk loh avanga hri danna lak nachang hrelo an tam tih hi a ni, a ti a. Chumi atan chuan media leh health department in thawhhona tha tak an neih a pawimawh thu a sawi bawk.
Mission Indradhanush hi kum 2014 December atang khan India ram pumah kalpui tan a ni a, tunah hian a aia chak leh ngawrh zawkin "Intensified" programme a kalpui tum leh niin, hemi hnuaiah hian dan pangngaia hridanna pek thin changlo palh emaw la ve theilo ten an dawn vek theih nan hmalak tum a ni. IMI hian India ram puma district 187 (India hmarchhak ah 52) ah kalpui tur a ni a. IMI hmachhawp hi a hautak avangin hemi tihlawhtling tur hian Sorkar laipui ministry 11 chu an thawk ho dawn a ni.
National Family Health Survey-IV (2015-2016) in a tarlan dan chuan Mizoram state chhunga naupang Kum 1 hnuailam hridanna dang zat chu 50.5% niin, hridanna dawnglo awm chhan tam ber chu mamawh ni a inhriat loh vang te (43.8%), vaccine chungchang hriatfiah tawkloh vangte (21.9%), vaccine la tur a pan tur hriatloh vang (13.6%) te a ni.
Media Workshop-ah hian UNICEF atangin Dr. Ravi Chandra, Dr. Maulik leh Pi Tahseen ten Routine Immunization (RI) leh IMI chungchang inhrilhfiahna leh media kaltlanga hmalak theih dan te sawiin, mahni state tin a chak zawka hmalak theih dan tur te state aiawh ten an sawi bawk. Workshop hi India hmarchhak state pasarih atangin journalist-te leh Information & Public Relations Department leh Health Department atanga aiawh ten an chhim a. Mizoram atangin mi pasarih kalin, a vaiin workshop a tel hi mi 60 an chuang a ni.
