Chief Engineer Project Pushpak Office chuan Rajiv Nagar Village Council ten Damparengpui leh Kawnpui inkar kawng BRTF leh PWD te enkawl kawng Km 35 leh Km 18 siamtha tura ngenna an thehluh chungchangah kawngchhiat chhan leh hmalak tumdan Chief Minister Pu Lal Thanhawla hnenah lekha a ziakin a sawifiah.
Chief Engineer Project Pushpak Office lehkha in a tarlan dan chuan khaw pasarih - Rajiv Nagar-I, Rajiv Nagar-II, Zomuantlang, Khantlang, Andermanik, Belkhai leh Tuipuibari-I khaw mipui te chak lakna Damparengpui leh Kawnpui inkar kawng Km 35 a thui enkawlthat loh a nih chhan chu Project Pushpak hnathawh mek, Upgradation of Sairang-Tuipuibari(S-T) to 4 lane road, National Highway Double Lane(NHDL) huamchhunga mi a ni a ti a. S-T to NHDL Upgradation project hnathawh mekna sum chu a chatlak tih tarlangin hnathawhna tur sum dawn a nih leh thuai theih nan Chief Minister Pu Lal Thanhawla'n nikum June ni 1 khan Defence Minister hnenah DO lehkha thawn in ngenna a siam tawh a. Kawngsiamna tur sum chu nghah mek a ni tih a tarlang.
Chief Engineer Project Pushpak Office chuan S-T kawngpui chu hun rei taka ta tawh Defence Ministry in a dah pawimawh loh zingah a awm thu leh he kawngpui chhe lai siam that leh a chulmam na tur sum pawh pek an ni lo tih a tarlang a. Hei vang hian Mizoram khawthlanglam kawngpui an enkawl te chu a tha thei lova. An remchan dan leh remhriatna ang ang a an thawm that thin thu sawiin hmalak chhunzawm a harsat tak em avangin Pushpak hotute chuan Chief Minister hmu in Defence Ministry-ah Special Fund dilsak tura an ngen tawh thu an sawi a ni.
Chief Engineer Project Pushpak Office chuan an hmachhawp hnaivai deuh te tarlang in - Sairang-Tuipuibari kawnga Buichali lei leh Lengpui inkar, thlawhna tumhmun panna atana hman thin, Km 31 leh Km 34 inkar kawngchhia leh culvert siam hna ruahtui hul veleh an tan dawn tih Chief Minister Office an hriattir a; Km 34 leh Km 41 inkar pawh siam tura ruahman a nih thu leh Headquarters Director General, Border Roads phalna hmuh a nih veleh tan a ni ang tih an tarlang.
