Vawiin hian Chief Minister Pu Lal Thanhawla chuan Thenzawla Central Agriculture University hnuaia Rs. 440 Crore senna tur College of Horticulture and Forestry Complex sak mek leh Incredible India programme hnuaia Integrated Development of New Eco-Tourism Destination under Swadesh Darshan- North East Circuit hmalaknaa 18 hole Golf Course hnathawh mek a tlawh a, Pu PC Lalthanliana, Minister, Horticulture, etc., Pu Lalduhtlana Ralte, Mizoram Chief Information Commissioner leh official pawimawh ten an tawiawm.

Pu Lal Thanhawla hian Central Agriculture University hnuaia College of Horticulture and Forestry, Tribeni Construction Limited in an sak mek hi a tlawh hmasa, he hmunah hian he project viltu, Central sawrkar in an dah Engineer Rajesh Kanna R, IES leh Contractor Company hotuten an lo dawng sawng a. An hnathawh meka harsatna an tawh hrang hrang te leh nakum March ni 1 atanga he hmunah ngei Class kal tan a nih theih nana Mizoram sawrkar lam atanga an mamawh hrang hrangte an lo thlen a. Heng an thil thlen te zingah hian a panna kawng chungchang te, P&E Department leh PHE lam atanga Estimate te bakah a sira mimal ram neitute nena harsatna awmpalh thei chungchang te chu a langsar zualte an ni a. Heng an mamawh hrang hrangte hi Chief Minister hian a theih anga ranga ngaihtuah a tum thu thawktute hi a hrilh bakah Thenzawl khawtlang hruaitute leh a chhehvela ram neitute chu hnathawktute lo tanpui tura ngenin, State dangte it em em College tha kan ram hmasawnna tura thil pawimawh tak a nihzia lo hre reng turin a chah a ni.

Hetihlai hian Horticulture College zirna, Bachelor of Science, Honour of Horticulture hi hi nikum atang khan Selesih a College of Veterinary Science & Animal Husbandry Complex ah lo kalpui tan tawh a nih avang leh; he hmunah hian zirlaite an len tawh loh deuh avangin Thenzawla Ministry of Tribal Affairs sum hmanga sak, Tribal Girls Hostel, tun hnai lawka Chief Minister vekin a lo hawn tawh chu lo hman lailawk mai theih a nih leh nih loh enfiahin Chief Minister hian a tlawh leh nghal a. He Building a room pakhat chu NEILIT Study Centre atana hman niin a dang zawng hi Bachelor of Science, Honour of Horticulture zirlai, first batch mi 18 leh 2 nd Batch mi 17 te tana lo hman lailawk theih nia hriat a ni. College of Horticulture & Forestry sak mek hi nakum March thlaah chuan Prefab Building leh Block dang paruk chu peih hman tum a nih anga peih a nih chuan insuan luh zui mai tur a ni dawn a ni. College of Horticulture & Forestry atan hian Central Agriculture University chuan Rs. 440 Crore a ruahmana, Phase 1 & Prefab Building sakna tur bik sum Rs. 88 Crore chu release tawh niin hna hi ngawrh taka thawh mek a ni.

Chief Minister in Horticulture College sak mek leh Class kal lailawkna tur hmun a ennaah hian Mizoram Horticulture Department Director Dr. E. Saipari, Jt Director Pu Rosanglura Ralte, Deputy Director pahnih Pu Vanlalruata Chenkual leh Pu V. Lalzuithanga te bakah Serchhip DHO M. Vanlalzami leh thawktu dangten an tawiawm a. College of Vety Science & Animal Husbandry atangin Dean Pu D. Kathiresan, Pi Lalnuntluangi Hmar leh Pu H. Prasad, Professor v eve leh Engineer Pu Nitish ten an tawiawm bawk.

Heng hmunte a tlawh hnuah hian Chief Minister hian Incredible India programme hnuaia Integrated Development of New Eco-Tourism Destination under Swadesh Darshan- North East Circuit hmalaknaa 18 hole Golf Course hnathawh mek chu a tlawh leh nghal a. He hmalakna hi Ministry of Tourism, Government of India hnuai thawh niin Project Consultant chu Fore Consultant Private Limite an ni a. A implementing Agency chu Mizoram Tourism Development Authority an ni. He hnathawh mekin Formation Cutting nasa taka thawh tawh niin, Cottage te pawh Russia ram bung pakhat, Siberia atanga thing tha chi hmangin engemawzat sak mek ani a. Tunlai tak hian ruah a tlak nasat avangin thawktute hi an chawl lailawk rih a. Hetianga khua a nawm chhoh zel chuan hna hi chhunzawm leh mai tur niin an sawi.

Vawiina Chief Minister in Thenzawla hmasawnna hnathawhte a tlawhnaah hian Minister Pu PC Lalthanliana bakah Mizoram Chief Information Commissioner, Pu Lalduhthlana Ralte, IFS (Rtd) chuan a tawiawm a. Thenzawl SDO Civil Charge la mektu Pu Abraham B. Khithei, MCS, Pu K. Saitluanga, MIS, DIPRO Serchhip leh Thenzawla official pawimawh ten an lo dawngsawng a ni.